Kinalisdan nga paninglon

Ambot tungod ba sa mga pagsaway, o nakaamgo lang nga wa siyay angay nga magpakabuta-bungol sa labing importante nga utang sa buhis nga kolektahunon sa iyang ahensiya, nibalitok si incoming Commissioner Lilia Guillermo sa Bureau of Internal Revenue (BIR) iyang pagpanghunaw sa eskandalo sa estate tax sa pamilyang Marcos.

Nipasalig na si Guillermo nga kon madawat nang mga dokumento sa kaso, nga motino pila gyod ang bayranan sa mga Marcos, iyang paninglan si President-elect Ferdinand Marcos Jr. Ug awhagon nga mahimong role model sa pagtuman sa mga lagda sa buhis.

 * * *

Hasta tingali si Marcos Jr. wa magpaabot sa ka-prangka ni Guillermo. Mahimo ra untang motak-om, motipas sa istorya, o maglikay sa mga pangutana. Pero nideklarar nga isip pangu sa BIR iyang trabaho ang pagpatuman sa desisyon sa Korte Suprema, nga final and executory na niadtong 1999, nga kinahanglang bayran sa mga Marcos ang estate tax sa kabtangan nga ilang napanunod sa pagkamatay ni Ferdinand Marcos Sr. niadtong 1989.

Gawas sa panguryuso isog ba gyod si Guillermo, nitumaw nang kabalaka nga kon magmatinud-anon mahimo nga di siya magdugay sa puwesto.

 * * *

Pero si Guillermo dunay gisandigan. Sinaligan siya ni outgoing Bangko Sentral Governor ug incoming Finance Secretary Benjamin Diokno sukad sa ilang panag-uban sa Department of Budget and Management (DBM).

Kaila si Guillermo sa iyang alas. Nipahibawo nang daan nga magpalaban siyang Diokno. Patabangon niya og pasabot ni Marcos Jr. nga angayng bayran ang utang. Nga sa kataposang demand letter sa BIR niadtong Disyembre 2021 niburot na ngadto sa P203.8 bilyones.

 * * *

Si Diokno mas kamao kay ni Guillermo. Mahimong makakita og paagi sa pagkolekta nga di manlipaghong sa kauwaw ang mga Marcos. Mahimo gani nga makakita og lusot aron nga i-dribol lang ang isyu hangtod nga matabonan sa bag-ong mga kontrobersiya.

Pero di pa mahimong tangtangon ni Marcos Jr. silang Diokno ug Guillermo. Gikinahanglan niya ang ilang kaligdong sa pagkumbinser sa mga negosyante nga kamao siyang manimon sa nasudnong ekonomiya nga ibilin ni Presidente Duterte karong udtong tutok sa Hunyo 30: Luya ang pagbangon gikan sa pandemya; paspas ang sulbong sa presyo sa palaliton; ug kapin sa P13 trilyones nga utang, kinadak-an sa kasaysayan.

Show comments