Labing isog nga kapitan sa Sugbo
Sa samang gabii ug samang hotel sa Mandaue City sa niaging buwan nga nideklarar ang mga Mangudadatu og suporta sa iyang kandidatura, si Bise Presidente Leni Robredo nipasalamat sa labing unang barangay kapitan sa Sugbo nga nibarug pagpangampanya para niya.
Si Barangay Kapitan Isabelito “Belong” Darnayla sa Basak, Lapu-Lapu City giimbitar ni Robredo sa iyang pagduaw sa Sugbo niadtong Abril 21 human sultihi sa iyang anak, si Aika, nga si Darnayla nagpadayon sa programa ni anhing DILG secretary Jesse Robredo nga Ubas (Ugnayan ng Barangay at Simbahan).
***
Nakita ni Darnayla ang kapuslanan sa Ubas pagpalambo sa pagtinabangay sa barangay ug mga lider sa relihiyusong mga grupo paghatod sa batakang panginahanglan sa katawhan.
Nakita sab niyang si Robredo ang labing ligdong ug takos nga moduma sa nasud sa mosunod nga unom ka tuig. Maong bantang nga nangampanya. Di lang sa iyang barangay kon dili hastag sa kasilinganang mga barangay. Maong nihangyo siya namong maghimo og duha ka pulungpulong kay di maigo sa Basak gym sa usa lang ka gabii ang mga Oponganon nga ganahang maminaw sa mga plataporma ni Robredo.
***
Nabalaka ang Leni-Kiko volunteers sa Opon nga gamiton mi ni Darnayla sa pagduso sa Ro-Sa (Robredo-Sara Duterte) tandem. Maong among gipangutana si Darnayla kon mahimo ba sab ming mangampanya para ni Senador Kiko Pangilinan.
Isip tubag, atubangan sa nanghugyaw nga gatosan ka Oponganon nga nitambong sa among pulungpulong niadtong Biyernes sa gabii, gisapawan ni Darnayla ang iyang gisul-ob og pink nga Leni-Kiko 2022 shirt.
***
Si Darnayla nipasalig ni Robredo nga modaog siya sa Basak ug ubang mga barangay nga duna siyay mga lider. Nitaho ang usa sa nitambong sa pulungpulong nga nakit-an niyang mga sakop sa nidagan pagka mayor sa Lapu-Lapu nga nanaod og Leni-Kiko tarps sa kadalanan.
Samtang nagsugod na og baha ang kuwarta nga gitapot sa sample ballots sa kabarangayan sa niaging semana, nakugang ang Leni-Kiko volunteers sa ubang mga syudad ug kalungsoran nga nakadawat og mga mensahe gikan sa mga politiko. Nga nangimbitar og kaon, nanghangyo og endorsement, ug nitanyag nga mokuyog sa mga pulungpulong. Ug nagpada og Leni-Kiko campaign materials sa volunteer centers. Mahimong si Darnayla ray nagpakita. Pero wa siya mag-inusara.
- Latest
