Pagbanhaw sa bakak nga bulawan
Daghang bersiyon ang nikatap nga mga istorya sa giingong bulawan sa mga Marcos. May nag-ingon nga ang mga bulawan gikan ni Prinsipe Tallano nga nangangkon nga maoy tag-iya sa Pilipinas. May nagtuo sab nga ang daghang bulawan gikan ni Heneral Tomoyuki Yamashita sa ikaduhang gubat sa kalibotan.
Bisan diin pa gikan, ang gisangyawng bulawan sa mga Marcos maoy rason sa pipila ka botante pagpili ni Ferdinand Marcos Jr. Nakumbinser sila nga ang mga bulawan igo nga makabayad sa tanang utang sa Pilipinas ug makapadato sa tanang Pilipinhon.
***
Diin man gikan ang mga huhungihong sa mga bulawan nga nikatap sa daghan nang katuigan, nga mas nisibaw tungod sa nagsingabot nga eleksiyon, pero way nakita nga bisan unsang sukaranan?
Si Ferdinand Marcos Sr. maoy nangangkon nga duna siyay 1,000 ka tonelada nga bulawan niadtong 1987. Usa ka tuig human siya napalayas sa EDSA People Power Revolution ug duha ka tuig sa wa pa siya mamatay. Labihan katalagsaon sa iyang pangangkon nga naghimo og imbestigasyon ang mga kongresista sa Estados Unidos nga gipangulohan ni Stephen Solarz sa New York.
***
Ang pangangkon sa mga bulawan nabisto sa recording sa panagsulti nilang Marcos Sr., Richard Hirschfeld, ug Robert Chastain sa Hawaii niadtong 1987:
- Matod ni Marcos ang iyang 1,000 ka tonelada nga bulawan balor og $14 bilyones;
- Maoy gitanyag niyang garantiya sa pagpangutang og $25 milyones gikan ni Prinsipe Mohammed Al Fassi sa Saudi Arabia;
- Aron gastuhon sa 10,000 niya ka sundawo nga mo-atake pagpahagsa sa pamunoan ni anhing Presidente Corazon Aquino.
***
Wa tuohi nilang Hirschfeld, Chastain, Solarz, ug kaubanan ang mga bulawan ni Marcos. Mahimong wa sab siya tuohi sa prinsipe. Maong wa kautang ug wa madayon ang giplanong pag-atake sa pamunoang Aquino.
Pero ang pagkabisto sa bakak wa kapugong sa mga Marcos pagbalikbalik sa bakak. Puno sa ubang bakak nga gipakatap sa social media sukad sa 2013. Nga mahimong makailad og minilyon ka botante karong Mayo 9. Segun pang Timothy Snyder sa librong "On Tyranny", magusbat ang demokrasya kon ang lider: “Mamakak. Sa tanang higayon. Pasanginlan ang mga kaatbang ug media nga bakakon. Kon ang tanan maglibog na unsay tinuod, mahimong imposible nang pagsukol.”
- Latest
