Di inutil sa mahal nga lana

Mahimong mahitabo karong buwana ang atong gikahadlokan. Nga moabot og kapin sa P100 kada litro sa krudo ug gasolina. Kon magpadayon ang dagkong layat sa presyo sa lana sa merkado sa kalibotan. Kon magpadayon ang gubat sa Ukraine. Ug kon way alternatibo sa lana sa Russia nga boykotan sa Estados Unidos ug ubang kanasuran.

Mahimong mas paspas nga matinuod ang mas dakong kahadlok. Nga di lang presyo sa lana ang mosaka. Nga momahal sab ang tanang palaliton ug serbisyo. Nga, human nakatimbakuwas na unta sa pandemya, motibugsok pagbalik ang kalibotanong ekonomiya.

 * * *

Masukod na asa kutob ang pagpaka aron ingnon sa pamunoan ni Presidente Rodrigo Duterte nga masagang ang kalibotanong krisis pinaagi lang sa fuel subsidy: Kay makapugong sa pagsaka sa plitehan; nga makapugong sa pagsaka sa presyo sa ubang palaliton; ug makalikay sa panginahanglan pagpasaka sa minimum nga suholan.

Karon pa lang, masihag na hinuon ang kataphaw sa ilang postura: Ang fuel subsidy para ra sa Marso ug sa Abril; bisan sa pasidaan sa mga ekonomista nga ang presyo sa lana di mobalik pagtidlom hangtod sa Hunyo ning tuiga.

 * * *

Bisan mas sayo nga mahuman ang gubat sa Ukraine, labi na kon makakita og lusot si Russian President Vladimir Putin pagsalbar sa iyang nawong sa di pagpadayon pag-ilog sa nasud, di dayon motidlom ang presyo sa lana ug sa ubang palaliton.

Kay ang lapad nga ekonomikanhong mga silot batok sa Russia magpadayon. Maong di dayon mahibalik ang normal ang suplay sa lana. Ug di dayon mahunong ang pagkabalda sa kalibotanong mga negosyo.

 * * *

Bisan sa pasalig sa economic managers sa Malakanyang, way mahimo ang Pilipinas ug ubang kanasuran pagpugong sa pagsaka sa presyo sa lana ug ubang palaliton. Makahimo hinuon sa pagdugang sa ayuda sa labing naapiki nga mga pamilya ug, sakto ka, pagsuspenso sa buhis sa lana.

Mahimong magplano sa importanteng mga lakaw ug molikay sa mga laag aron di magsagunto sa mahal nga lana. Mahimong magdaginot aron di mas masakitan sa mahal nga tubig ug kuryente. Kon magbugno ang mga higante, unang mapisat ang gagmay. Pero mahimo tang magpa-ipli sa katalagman. Aron makaabot sa mas maayong mga adlaw. Sa pakigbisog sa mas makahuloganong kausaban.