Kasayon ug kalisod sa teknolohiya
Nagpuwa ang akong router sa PLDT Home pagmata nako gahapon sa kadlawon. Sa ato pa, offline ug di kong kasibya. Mahimo ra g’yud unta nga mobalik ko og katug. Ug mopasabot sa viewers nganong di ka-programa sa SibyaTV. Pero wa ko mahimutang kay:
- Nagsabot ming Cebu City Vice Mayoral Candidate Bimbo Fernandez, ug ako nang na-plug sa akong programa sa niaging hapon, nga ako siyang interbyuhon; ug
- Kalit lang kong nahinumdom nga nahibalik nang akong internet connection sa SkyFiber sa niaging adlaw, kapin duha ka buwan human sa bagyong Odette.
***
Gipaandar nakong router sa SkyFiber. Pero offline gihapon ang laptop nga akong gisaligan sa pagsibya. Nangukay ko sa nalista nga passwords. Taas-taas nang lista kay pila na sab ka higayon nga giilisan sa SkyFiber ang ilang router.
Way bisan usa sa passwords ang sakto. Nakalimtan diay nakog lista ang kinabag-ohan. Maayo na lang nga ang akong telepono naka-detect sa router. Kusog ang signal. Pero di kong kasibya sa telepono. Ug ang phone settings di motug-an sa password. Nitanyag hinuon pag-share sa QR code. Nga wa kong kahibawo unsaon pagbasa sa laptop.
***
Hapit nang alas-6 sa buntag. Nga maoy sugod sa akong programa. Pero sayo pa aron mamukaw sa taga PLDT. Mo-text na unta kong Sir Bimbo nga di madayon ang among interview, dihang nahinumdom sa akong Google wifi.
Nga gipalit pila ka tuig nang nilabay aron mapalapdan ang internet signal sa tibuok namong bay hangtod sa roofdeck. Wa ko moginhawa nga nibalhin sa kable sa Google wifi gikan sa PLDT router ngadto sa SkyFiber.
***
Nanud dayon ang tanan nakong chat messages sa laptop. Online na ko. Kay memoryado diay sa tanan nakong kahimanan ang password sa Google wifi. Kay konektado man sa LAN cable, iyang gisapawan ang password sa SkyFiber nga akong nakalimtan.
Samtang nagsibya, nga nauwahi lang og pila ka gutlo, nakaamgo ko unsa kalisod ug kasayon ang bag-ong teknolohiya sa komunikasyon: Na-offline ang akong PLDT sa gamayng bikil sa linya sa gawas sa among bay; makawang untang pagkabalik sa SkyFiber tungod sa kayam-angan sa passwords; pero natabangan sa buwag nga kahimanan nga nipalapad sa signal ug nipasayon sa paggamit sa routers.
- Latest
