Ang maayong balita gikan sa OCTA Research, nga mas maayong mohubad sa kasayuran nga nahipos sa Department of Health (DOH) labot sa pandemya: Bisan sa padayong pagdaghan sa bag-ong mga kaso sa COVID-19, di na sama kapaspas ang pagsulbong sa Metro Manila.
Ang hubad sa OCTA mao nga niabot na sa kinatas-an nga ang-ang ang tinakdanay sa kaulohan nga gidudahang tungod na sa Omicron. Maong nagtuo sila nga mohinay nang sulbong sa mga kaso sa mosunod nga mga adlaw. Ug magsugod na gani sa pagtidlom sa mosunod nga mga semana.
-o0o-
Ang di maayong balita mao nga mao pay pagsugod sa pagsulbong sa bag-ong mga kaso sa Sugbo ug Central Visayas ug ubang bahin sa Kabisay-an ug Mindanao. Kansang mas paspas nga tinakdanay gikabalak-an nga awas sa makalilisang nga sulbong sa Metro Manila.
May sukaranan ang kabalaka nga kon tinuod man nga motidlom na ang mga kaso sa kaulohan magpabilin gihapon nga taas ang tanang kaso sa tibuok Pilipinas. Kon, simbako, makabuylo na ang tinakdanay sa mga probinsiya. Igo lang mabalhin ang epicenter ngadto sa uban nga mga rehiyon.
-o0o-
Ang bag-ong pangagpas sa OCTA nitakdo sa ilang pasalig nga ang pagsulbong sa mga kaso tungod sa Omicron, kon basehan ang nahitabo sa South Africa nga maoy unang nakabantay sa variant, molungtad lang og usa ka buwan.
Nisibog hinuon og diyutay ang OCTA sa pasalig sa usa sa ilang mga opisyal nga ang Omicron magsilbi nga mas epektibo nga bakuna nga motimaan sa sinugdanan sa kataposan na sa pandemya.
-o0o-
Kay ang pait nga kamatuoran mao nga bisan kon tinuod pa nga mubo ra ang lahutay sa Omicron, tungod sa mga pangagpas sa mga eksperto nga mahunong nang tinakdanay kay duna nay mas lapad nga panagang ang mas daghan nga matakdan, moawas gihapon ang mga ospital ug isolation facilities ug matakdan gihapon ang mga doktor, nurses, ug healthcare workers.
Ug bisan sa pasalig nga di sama kagrabe sa Delta ang sakit nga mamugna sa Omicron, kansang nag-unang timaan mao ra ang karat sa tutonlan, daghan gihapon ang ma-ospital ug mangamatay. Labi nang senior citizens, mga masakiton nang daan, ug ang mga way bakuna.