Di tanan nagpahimulos
Gisugo ko sa akong asawa pagpalit og tubig. Tungod sa kanihit human ni Odette, wa ko mahibung sa linya sa mga namalit og tubig sa shopping mall nga akong giadtoan. Pero nakalitan pagkakakita nga kinarton ang tubig nga gipamalit sa mga nag-una sa linya.
Nihangyo ko sa tindero mahimo bang usa ra ka botelya ang ako. Nipasalig siya nga mahimo ra. Giablihan niyang karton ug gihatagan ko og usa ka botelya nga 10 ka litro ang sud. Wa pa gani kong kapangutana, nibalibad siyang wa silay mas gagmay nga baligya.
* * *
Mas taas ang linya paingon sa kahera. Hapit tanang naglinya namalit og mas daghang tubig. Nigaan og diyutay ang akong pinalit dihang gipahinumdoman sa public address system sa mall ang mga kahera nga usa ra ka botelya ang mapalit sa kada kustomer.
Ang mga nag-una nga namalit og mas daghan nidali pagkamay sa ilang mga kauban sa pagkuyog nila sa kahera. Ang uban nihangyo sa mga kustomer nga way tubig nga ipaangkon ang ilang pinalit aron lang makalusot. Pipila ra ang nabalibaran nga di makapalit sa mas daghang tubig.
* * *
Gipahibawo sa kahera nga modawat sila og credit card. Nisugot sab ang tigputos nga isud sa akong backpack ang tubig ug ubang pinalit. Tungod sa kabug-at ug kadako sa botelya sa tubig, di mahimong ikabiba. Di hinuon ako ray nagbaguod. Hapit tanang kadungan sa linya sa taxi nasugoan sab sa ilang asawa pagpalit og tubig.
Pag-abot na sa amo, ako dayong gisusi ang resibo aron mahibaw-an tagpila ang tubig. Nakugang ko sa kagamay ra sa nabayran. Pino ang mga numero pero nakumbinser kong wa maapil sa kahera ang tubig.
* * *
Kay suod man sa akong asawa ang tagduma sa mall, iya dayong gipangutana unsaong makabayad mi aron di maapiki ang kahera. Giawhag ming mopada og letrado sa tubig ug resibo aron iyang ipasusi. Na-istorya nang akong kasinatian sa SibyaTV dihang gipada sa tagduma ang letrato sa resibo nga may marka nga nabayran diay nakong tubig og P85.
Nahinangop kong taliwa sa katalagman, may dagkong negosyante nga nitabang pinaagi sa pagpamaligya og tubig nga mas barato kay sa naandan. Nauwaw hinuon og diyutay sa kahanap sa akong panan-aw.
- Latest
