Mga timaan sa pataka nga pagduma
Kon naglibog ka nganong iwit ang Pilipinas sa hapit tanang kalibotanong listahan sa pagduma sa pandemya sa COVID-19, hinaot nga ang resulta sa bag-o lang nahuman nga tulo ka adlaw nga National Vaccination Drive makatabang sa pagpasabot:
• Ang National Task Force (NTF) batok sa COVID-19 maoy nagtakda sa orihinal nga target nga 15 milyones ang mabakunahan;
• Ang NTF ra say nilaslas sa target ngadto sa 9 milyones pila ka adlaw dayong sugod sa kalihokan; ug
• Ang NTF ra sab ang niinsistir nga malampuson ang kalihokan bisan wa makab-ot ang target.
* * *
Sa pagpahibawo og target sa bisan unsang kalihokan, ang mga tigpasiugda gipanghinaot nga nakasabot nga hukman ang ilang kalamposan o kapakyasan sa pagkumparar sa aktuwal nilang mahimo ngadto sa ilang target:
• Maong sa di pa magtugatuga og takda og target, angayng susihon una unsa ang kinatibuk-an nga mga panginahanglan sa pagkab-ot o paglapas ini; ug
• Palambuon ang mga nahan-ay na, andamon ang tanang panginahanglan ug tapakan ang tanang kakuwangan aron pagpadako sa kahigayonan o pagseguro g’yud nga labing menos makab-ot ug labing maayo nga malabwan pa g’yud ang target.
* * *
Ang kapakyas pagtuman sa nag-usab-usab nga target nagmatuod nga ang mga pasalig sa mga tigpasiugda gi-drowing ra sa papel ug wa magtugkad sa yuta. Wa susiha unsa kaandam ang tanang hingtungdan. Ambot may ideya ba unsay mga pangandam nga angayng himuon.
Nga mao ang pait nga sugilanon sa kinatibuk-an nila nga pagduma sa pandemya. Nag-umol og mga lagda pinasikad sa bisan unsa lang nga nasud sa ilang hunahuna. Sa way pagsusi makatabang ba sa nasud ug sa katawhan.
* * *
Laing ebidensiya sa patakda nga pagduma sa pandemya: Kita ang kinadak-an og utang para sa pandemya pero kita ang iwit sa tanang kanasuran sa pagpanghatag og ayuda, sa pagtambal sa mga masakiton, sa pagpalapad sa PCR testing ug contact tracing, sa pagpamakuna ug sa pagpabangon sa ekonomiya.
Sa kataposang ihap sa Bureau of Treasury, niabot na og P11.97 trilyones ang lokal ug langyawng utang sa Pilipinas hangtod sa kataposan sa Oktubre ning tuiga. Sa ato pa, ang kada Pilipino, apil nang bag-o pa nga natawo nga mga bata, utangan og ?109,816.51.
- Latest
