Mga leksiyon sa Pharmally
Mahibaw-an nato karong adlawa, inig padayon sa imbestigasyon sa Senate Blue Ribbon Committee sa mga transaksiyon sa Pharmally Pharmaceutical Corp., ang dugang detalye sa nabaraw nga paglayas unta sa Pilipinas sa managsuong Mohit ug Twinkle Dargani, kinsa gipapriso sa mga senador kay nagdumili paghatag sa mga dokumentong ilang gipangayo.
Diin man sila nitago dihang giluwatan og arrest warrant sa Senado? Kinsa may nitabang sa pag-charter og pribadong ayroplano gikan sa Singapore nga modala unta nila sa Malaysia? Kinsa may nipasalig nga mas sayon nga makalayas kon moagi sa Davao City International Airport?
***
Pero karon pa lang duna nay mga pagtulon-an nga makat-onan sa kasinatian sa mga Dargani:
- Sa di pa mosud og P1.85 milyones nga kontrata pag-charter og ayroplano seguruon nga way nakatimaho sa plano, o nga mabawi pang kuwarta kon mabulilyaso;
- Sa di pa magpatuyang og gasto, sama sa pagpalit og Porsche, Lamborghini, ug Lexus, o pag-charter og Lear Jet 60, paningkamotan nga di mabisto sa publiko kay lisod ipasabot sa Bureau of Internal Revenue (BIR) nganong P1,000 ra ang gibayran nga income tax sa niaging tuig;
***
- Sa di pa motuo sa pagdupa ni Presidente Duterte pinaagi sa sulti mangutana una sa mga mas nasuhito, sama sa ilang financier nga si Michael Yang, kon moresulta ba sa aktuwal nga proteksiyon kon adto sila moagi sa Davao City;
- Sa di pa mobilib sa ilang koneksiyon sa Bureau of Immigration (BI) nga nipasakay nila sa ayroplano bisan naapil sa lookout bulletin, susihon una wa bay taga airport nga nipindot sa pangu sa Senate Sergeant at Arms, Heneral Rene Samonte, nga kanhi hepe sa Philippine Air Force;
***
- Sa di pa mo-hire sa mga abogado nga nipasalig pagrepresentar nila seguruon una nga ang ilang interes di lang ang ilang katakos sa pagbayad sa makalilisang nilang acceptance fees nga wa sila makatrabaho sa Malakanyang; ug
- Sa di pa mokumpiyansa nga ang paglikay sa Senado sama ra kasayon sa pagsipong sa binilyon ka pesos nga mga transaksiyon taliwa sa pandemya tungod sa tabang sa mga tinudlo ug mga negosyanteng suod sa presidente, susihon una kon ang presidente gituohan pa ba sa iyang kaugalingong anak.
- Latest
