Listahan sa pakauwawng mga sulti

Bisan unsay isulti ni Presidente Rodrigo Duterte mahimong policy, mao nay pasabot ni presidential spokesman Harry Roque sa mga higayon nga lahi ang sulti sa presidente ug ubang opisyal sa gobyerno. Sa ato pa, ang sulti sa presidente maoy matuman.

Pero ang presidente nag-usab-usab sa iyang sulti. May mga higayong niangkon nga nag-komedya ra (mag-jet ski padung Spratlys) ug nagbinata (dihang wa siya pakita sa publiko sa kapin semana). Bisan sa pahibawo ni Roque, may mga sulti ang presidente nga wa tumana sa gabinete (sama sa pagpadakop sa mga barangay kapitan).

 * * *

May mga sulti sang presidente nga bisan wa tumana sa iyang mga opisyal wa niya bakwia. Sama sa pag-angkon nga di mapapahawa ang mga barko sa Chinese maritime militia kay gi-okupahan sa China ang West Philippine Sea (WPS).

Wa motuo niya silang Defense Secretary Delfin Lorenzana ug Foreign Affairs Secretary Teodoro Locsin kinsa padayong nagprotesta sa presensiya sa China. Nga, sukwahi sa sulti sa presidente, wa mangangkon sa tibuok WPS. Pero, ambot tungod ba kaha kay nahinayak na, wa bakwia ang sulti sa presidente nga makadaot sa atong pangangkon sa WPS.

 * * *

Sa pikas bahin, may angay untang isulti si Presidente Duterte nga, ambot tungod ba kaha sa garbo, wa niya isulti. Pananglitan, angay untang pasalamatan ang Estados Unidos nga maoy kinadaghanan og nahatag nga mga bakuna sa COVID-19.

Sa kataposang ihap, 8.8 milyones ka doses sa mga bakuna sa Pfizer ug Johnson & Johnson ang nadawat sa Pilipinas. Way pasalamat para sa mga Amerikanhon pero kamilyon na niya gipasalamatan ang donasyon sa China nga usa ka milyon ka doses sa Sinovac.

 * * *

Lisod labwan ang kadaghan niyang usab sa hinungdan sa pagdagan pagka bise presidente piniliay sa 2022: Una, aron pag-maintain sa equilibrium; ikaduha, aron pagsungog sa iyang mga kaatbang; ug ikatulo, aron may immunity sa mga kaso.

Human gipasabot sa tinuod nga mga eksperto sa balaod nga way immunity sa mga kaso ang bise presidente, nahibawo na ta unsay posibleng mga lusot sa president; nagkomedya, o nanungog, o nagbinata. O ba kaha di na niya hisgutan sa pamasin nga matabonan sa bag-ong mga paukyab ang nagkataas nga listahan sa makauuwaw niyang sayop.