Kon gipaminaw pa lang si Villa
Karong gipagawas na sa Commission on Audit (COA) ang mga detalye sa transaksiyon, makasabot nang mga Sugbuanon nganong, dihang giila ang Cebu City nga epicenter sa COVID-19 sa tibuok Pilipinas tungod sa pagsulbong sa mga kaso sa niaging tuig, gibisto ni kanhi City Health officer Dr. Daisy Villa nga:
• Nagpataka ang pipila ka opisyal sa City Hall pagpamalit og rapid test kits;
• Apil sa gikompra ang kolorum nga test kits nga way pagtugot sa Food and Drug Administration; ug
• Nibalibad siya dihang namugos ang samang mga opisyal nga ipagamit.
* * *
Ang makapakugang nga pasangil ni Villa iyang giluwatan atubangan sa mga sakop sa Cebu City Council nga gipangulohan ni Bise Mayor Mike Rama ug gidominahan sa mga alyado nilang Mayor Edgar Labella. Wa kahatag si Villa og dugang detalye kay gipainom siya ni Rama og tubig ug wa na hatagi og kahigayonan nga makapahibawo og dugang kasayuran.
Pero sa wa pa hingpit nga mapahilom nanganlan ni Villa si Cebu City Administrator Floro Casas Jr. nga mao ang nangu sa mga opisyal nga nipalusot sa transaksiyon.
* * *
Matod sa COA kalapasan sa balaod ang paglaktaw nilang Labella, Casas, ug kaubanan sa buhatan ni Villa nga mas takos nga makasubli sa pagkompra sa P29 milyones nga rapid test kits ug P18 milyones nga RT-PCR machine.
Ambot tungod ba sa ka wa nilay bilib ni Villa o di lang g’yung kamao, way nakabadlong nilang Labella, Casas, ug kaubanan paghatag sa RT-PCR machine ngadto sa Vicente Sotto Memorial Medical Center nga way dokumento nga motakda sa responsibilidad sa makina ug moseguro nga kapahimuslan sa mga magbubuhis sa Cebu City.
* * *
Sakto si Villa sa pagbalibad dihang gisugo sa pagpangu sa rapid mass testing sa Mayo sa niaging tuig nga gipamugos sa mga mayor sa Cebu City, Mandaue City, ug Lapu-Lapu City. Kay gawas nga kolorum g’yud diay ang test kits, mao say gibasol sa mga eksperto sa National Task Force batok COVID-19 nga nakapasamot sa tinakdanay.
Unsay nahitabo ni Villa? Gitangtang siya sa puwesto human pasanginli ni Casas nga di kamao sa iyang trabaho. Ning paggawas sa COA report, mahimong iya ni Villa ang kataposang katawa.
- Latest
