Pagpili og tarung nga liderato

Unsay mga panghitabo sa piniliay sa 2010 nga nakapakumbinser sa 15.2 milyones ka Pilipino, 42% sa tanang nakabotar, pagpili ni Noynoy Aquino pagka presidente? Gawas sa kamatayon sa iyang inahan siyam ka buwan sa wa pang piniliay, unsa may laing nakaapektar sa desisyon sa mga botante?

Sa pikas nga bahin, unsay mga panghitabo sa piniliay sa 2016 nga nakapakumbinser sa 16.6 milyones ka Pilipino, o 39% sa tanang nakabotar, pagpili ni Presidente Rodrigo Duterte? Gawas sa iyang mga pasalig, unsa may laing nakaapektar sa desisyon sa mga botante?

 * * *

Mahimo ba nga atong hinumdoman ang labing importante nga mga sukaranan sa resulta sa piniliay sa 2016? Giunsa pagtuki ang labing mahinungdanon nga mga isyu ug mga plataporma? Unsa kadako ang influencia sa mga personalidad? Unsa ang mga kampanya sa traditional ug social media nga labing nakadani sa mga botante?

Unsa ang mga saad nga wa matuman? Unsa ang mas importante ug mas dinalian nga mga panginahanglan sa nasud ug sa katawhan nga nataligam-an? Unsa ang mga kalidad sa mga nagpapili nga wa mahatagi sa tukma nga importansiya?

 * * *

Mahimo ba nga ato sang hinumdoman ang labing importante nga mga hinungdan sa resulta sa piniliay sa 2010? Unsa kamakahuloganon ug kamatinud-anon ang mga plataporma sa mga nagpapili? Unsa kadako ang kabig sa mga personalidad? Giunsa pagsangyaw ang mga mensahe nga labing nakapadani sa mga botante?

Unsa ang kalainan sa mga saad nga giluwatan ug sa aktuwal nga gihimo sa nakalingkod nga pamunoan? Unsa ang mga kalidad sa mga nanagan nga labing gihugopan sa mga dumadapig?

 * * *

Mahimo ba nga atong likayan ug batokan ang tanang pagmaniobra, pagpangilad, pagpamakak ug pagpanghudlat nga nakalipat sa katawhan sa piniliay sa 2016? Mahimo ba nga atong banhawon ug panghingusgan pa ang kakugi, kamatinud-anon, kamalaumon, pagbarug sa katarung ug pagtinabangay sa 2010?

Kon nalingla ta sa 2016, may abunda na tang sukaranan sa paglikay ug pagbadlong sa mga timaan sa laing katalagman sa piniliay sa Mayo sa sunod tuig. Kon nakapili ta og tarung nga lider sa 2010, may sukaranan ang paglaom nga, sa makausa pa, makapili ta og laing tarung nga liderato sa 2022.