Sa pagtimbakuwas sa katawhan
Ang kahaw-ang nga akong nabatyagan sa pagkamatay ni Presidente Cory Aquino niadtong 2009 susama sa kahaw-ang nga naghasol nako hangtod karon, upat ka adlaw human sa kamatayon ni Presidente Noynoy Aquino.
Labaw sa kamingaw sa pisikal nilang presensiya sa pagtaliwan sa laing kalibotan --giunhan og laygay nga magul-anong kahingawa sa kanser ni Cory ug kalit ug makapakugang sa bahin ni Noynoy-- ang mas lisod tapakan nga kahaw-ang sa maayong mga mithi nga ilang gibarugan: Tarung nga pagduma sa gobyerno, matinud-anon nga pagserbisyo sa katawhan ug determinadong paningkamot sa mas sanag nga ugma.
***
Labihan kalapad sa kahaw-ang nga gibiyaan ni Cory nga ang iya rang anak ang mapanagan-on nga nipuli. Bisan di andam, bisan uwahi na sa nakabuylong mga kaatbang, wa kabalibad si Noynoy sa naglanuglanog nga awhag sa pagpadayon sa talagsaong liderato sa iyang mga ginikanan.
Ug labihan kamakapakugang sa hukom ni Noynoy pagdagan pagka presidente sa 2010 nga way bisan usa ka kauban niya sa partido nga nangahas pagsukwahi, ni bisan sa nag-unang presidentiables nga nakagasto na og binilyon nga nakapiog sa gamhanang bul-og nga nihatod ni Noynoy sa Malakanyang.
***
Namatay si Noynoy, sama ni Cory, pila na lang ka buwan sa di pa ang piniliayng presidensiyal. Kinsa man sa mga lider sa nasud karon ang mangarisgar sa pagtapak sa dakong haw-ang nga iyang gibiyaan?
Sa paglubong ni Cory ang ngan na ni Noynoy ang gisiyagit sa katawhan. Pero wa dayon siya makaluwat sa desisyon nga nakapakugang bisan sa iyang mga igsuon. Atong panid-an ang motumaw nga mga ngan sa mosunod nga mga adlaw.
***
Pero ang higpit nga mga lagda sa gobyerno tungod sa pandemya sa COVID-19, nga klarong gipahimuslan na sa mga nagtungkawo sa gahom sa pagpamintaha pagpalambo sa ilang politikanhong mga ambisyon sa sunod tuig, mahimong makagapos ni bisan kinsa nga nagdamgo nga mamahimong sunod nga Noynoy.
Sa pikas nga bahin, ang hudlat sa kamatayon wa kababag ni kanhi senador Ninoy Aquino sa pagbalik sa nasud. Ang kabangis sa diktadurang Marcos wa kabugnaw ni Cory sa paghiusa sa nagkatibuwaag nga oposisyon. Ang paghigmata sa katawhang Pilipinhon maoy labing nakadasig nilang Ninoy ug Cory. Motimbakuwas na ba sab ang katawhan paglingkawas sa laing katalagman?
- Latest