Di diay para sa Sugbo
Human gipasimang ang tanang incoming international flights sa Mactan Cebu International Airport (MCIA) ngadto sa Ninoy Aquino International Airport (NAIA), mas dako ang gasto sa tanan nga Returning Overseas Filipinos (ROFs) kay mas mahal ang bayranan sa quarantine hotels sa Metro Manila ug mas layo pa gyod ang gitugpahan gikan sa gikamingawan nga mga sakop sa pamilya.
Sa ato pa, di diay pagpanalipod sa interes sa ROFs ang hinungdan sa pag-insistir sa mga tagduma sa Kapitolyo sa Sugbo sa pagsukwahi sa lagda sa Inter-Agency Task Force (IATF) batok sa Covid-19.
***
Karon nga adto na sila sa Metro Manila matanggong sud sa labing menos 10 ka adlaw human sa ilang pagtugpa sa NAIA sa Pasay City inay sa MCIA sa Lapu-Lapu City, mas nainat ang kalayo ug kamingaw sa Overseas Filipino Workers (OFWs) sa ilang mga minahal sa kinabuhi.
Sa ato pa, di diay pagpatigbabaw sa interes sa OFWs ang hinungdan sa pagpangugat sa lokal nga mga opisyal sa Sugbo nga di balaod ang mga lagda sa IATF mao nga mahimo ra nila nga usbon o hingpit gyod nga isalikway.
***
Gawas sa ROFs ug OFWs nahasol ug nadugangan sab ang gasto sa ubang mga pasahero nga may dinalian nga mga biyahe sa ubang kanasuran kay hasta ang outgoing international flights gikan unta sa MCIA gi-divert sa mga kompaniya sa ayroplano ngadto sa NAIA.
Sa ato pa, di diay ang paghimong mas hapsay sa pagbiyahe sa mga pasahero ang tuyo sa pangangkon nga mas maayo ang mga lagda sa Sugbo ug maoy angayng ipatuman sa ubang bahin sa nasud.
***
Tungod sa usa ka semana na nga pagkawagtang sa international flights, nitidlom ang kita di lang sa MCIA ug mga negosyo ug panginabuhi sud sa tugpahanan kon dili hasta sa lokal nga quarantine hotels ug mga negosyo ug panginabuhi sa palibot sa tugpahanan.
Sa ato pa, di diay ang pagpalambo sa interes sa Sugbo ug mga Sugbuanon ang motibo nga nagduso sa lokal nga mga politiko sa pagpamugos sa lokal nga otonomiya ug pagpasumbingay sa kadaghan sa atong mga botante sa 2022 atubangan sa seryusong hulga sa mas mananakod ug mas makamatay nga bag-ong variants sa COVID-19.
- Latest
