Padayong paghuwat sa national ID
Dihang nagparehistro ko online para sa national ID kapin sa duha ka semana ang nilabay, gisaaran ko sa website sa Philippine Identification System (PhilSys) nga sa Mayo 24 makapadayon na sa sunod nga hugna. Nga magkinahanglan sa linawas nga pag-adto sa mga sentro nga mokuha sa biometrics (fingerprints, irises, ug facial image) sa registration centers sa mga syudad ug lungsod.
Tuod man, niadtong Lunes gi-text ko sa PhilSys nga nipahinumdom sa pagsusi sa ilang website (philsys.gov.ph) kon naapil ba ang akong pinuy-anang lungsod sa Consolacion sa Step 2.
* * *
Nipahibawo ang ilang website nga 14 pa ka syudad ug lungsod sa tibuok Pilipinas ang makahimo na pag-atiman sa online registrants: Unom ra sa Kabisay-an, tulo ra sa Central Visayas ug usa ra sa Sugbo. Nakatag-an ka, wa maapil ang Consolacion.
Bugtong nalista sa Sugbo mao ang lungsod sa Bantayan sa isla sa Bantayan. Usa ra sab sa Bohol, Jagna, ug sa Negros Oriental, Dumaguete City. Usa ra sa tibuok Eastern Visayas, Baybay City sa Leyte. Duha sa Western Visayas, San Jose sa Antique ug Roxas City sa Capiz.
* * *
Mameligro nga masabonan ni Presidente Rodrigo Duterte ang kadagkoan sa PhilSys kon may makahunghong niya nga way bisan usa ka lugar sa Mindanao, labaw na ang iyang pinuy-anan nga Davao City, nga naapil sa pasiuna nga lista.
Ang ilang website igo rang nitambag namong tanan nga nabawo sa pagsige og susi sa ilang Facebook Page kay maglista sila ang dugang mga syudad ug mga lungsod sa mosunod nga mga semana.
* * *
Gitambagan sab sa website ang mga house-to-house registrants nga di na sila kinahanglang magparehistro online. Igo na lang nga maghuwat sa text message sa Philippine Statistics Authority (PSA) o sa updates sa ilang city hall o munisipyo.
Mas hayahay ang mga nakahuman na sa Step 2. Ihatod ang national ID sa ilang mga pinuy-anan sa mga kartero sa Philippine Postal Corp. (PhilPost). Ang 103,935 ka IDs nga gisugdan pag-apud-apod sa niaging semana wa ra hinuon sa kumingking sa 110 milyones nga populasyon sa Pilipinas. Nga, segun sa Commission on Population and Development, napun-an og 1.1 milyones ka bag-ong bata atol sa pandemya.
- Latest
