Di magpatambag sa mga kaatbang
Bisan pa kon uyonan sa mga senador ang awhag sa iyang kanhi kauban ug kanhi hepe sa Armed Forces of the Philippines (AFP) nga si Rodolfo Biazon nga tigumon ni Presidente Rodrigo Duterte ang National Security Council (NSC) aron pag-umol sa opisyal nga baruganan sa West Philippine Sea (WPS), dako ang kahigayonan nga isnabon sila sa presidente.
Kay kon ipatawag ang mga sakop sa NSC, mapugos si Presidente Duterte sa pagpaminaw nilang Bise Presidente Leni Robredo ug sa upat ka kanhi presidente nga mahimong mosukwahi sa iyang baruganan sa kontrobersiya.
* * *
Gawas ni Robredo, mga sakop sa NSC silang kanhi presidente Noynoy Aquino, kanhi presidente Gloria Macapagal-Arroyo, kanhi presidente Erap Estrada, ug kanhi presidente Fidel Ramos. Nilang lima, mahimong si Arroyo ra ang modapig ni presidente Duterte.
Kay sama ni Duterte si Arroyo nakigsuod pag-ayo sa China atol sa usa ka dekada niyang pagduma sa Malakanyang. Gani, gipasanginlan si Arroyo nga mao ang tinuod nga utok sa P16 bilyones ($329 milyones) nga eskandalo sa iyang proyekto nga National Broadband Network uban sa ZTE Corp., higante sa telekomunikasyon sa China.
* * *
Bisan nakalingkawas na sa COVID-19, mahimong di sama kasuhito sa WPS si Estrada kon ikumparar nilang Ramos ug Aquino nga pulos may direktang kasinatian sa kamat-an sa China:
• Si Ramos gikantahan lang ni China President Jiang Zemin og “Love Me Tender” ug “Let Me Call You Sweetheart” sa yate ni Ramos, Ang Pangulo, niadtong 1996 pero giilog g’yud gihapon sa China ang Mischief Reef; ug
• Si Aquino gisaaran ni China President Hu Jintao sa sabutsabot nga giduma sa Estados Unidos niadtong 2012 nga magdungan og biya ang ilang mga barko sa Scarborough Shoal pero gibukubuko.
* * *
Bisan ipatawag pang NSC, di mapugos si Presidente Duterte pag-uyon sa tambag nilang Robredo, Aquino, Arroyo, Estrada, Ramos, ang Bisaya nga AFP Chief Cirilito Sobejana, ug mga sakop sa gabinete ug Kongreso.
Mahimo gani nga iyang pangasab-an ang tanang manambong ug pahinumdoman nga siya, di sila, ang chief architect sa foreign policy sa Pilipinas. O mahimong tumanon ang tambag ni kanhi Senate president Juan Ponce Enrile nga di tagdon ang sukwahi nga mga baruganan ug mosurender na lang sa China.
- Latest
