Bantang nga pagbudhi sa nasud
Haskang paita ni Presidente Rodrigo Duterte: Bisan sa pagbudhi sa nasud, wa magkadimao. Gikopya niya ang linya sa China nga ang kadaogan sa Pilipinas sa Permanent Court of Arbitration usa ra ka piraso sa papel, gipalabwan pa gani ang sulti sa China nga way epekto ang desisyon pinaagi sa pag-ingon nga iya ning ilabay sa basurahan.
Pero ang iyang tinudlong mga sakop sa gabinete wa modason sa iyang baruganan. Sa iyang pag-insistir nga dako ang atong utang kabubut-on sa China, gibalikas ug gipalayas nilang China gikan sa West Philippine Sea.
* * *
Sa iyang pagdeklarar nga siyay magbuot sa foreign policy sa Pilipinas, morag si Presidente Duterte na lay wa kabantay nga ang iyang sulti wa motakdo sa mga gihimo sa burukrasya:
• Human niya gibasura ang Visiting Forces Agreement, nisud sa WPS ang Amerikanhong mga barko sa gubat ug gihimo ang nalangayng Balikatan sa mga sundawo sa duha ka nasud; ug
• Human siya niangkon nga wa tay dag-anan sa China maong di usikan ang kinabuhi sa mga sundawong Pilipinhon, nagpatrolya sa WPS ang mga barko sa Philippine Coast Guard ug nipapahawa sa militia boats sa China.
* * *
Atubangan sa iyang pagtila sa China, nagpabakuna gani sa Sinopharm (nga giingong maoy bakuna ni Presidente Xi Jinping) bisan way pagtugot sa Food and Drug Administration, ang Department of Foreign Affairs nigamit sa iyang diskurso pagsukwahi sa iyang paglikoy.
Nipasabot ang DFA nga ang opisyal nga baruganan sa Pilipinas mao ang mensahe sa presidente sa United Nations General Assembly nga ang arbitral ruling kabahin na sa balaod sa kalibotan, di na mausab, masabutsabotan, ni mapugngan.
* * *
Bisan ang troll army sa presidente, nga naanad nga mosunod og usa lang ka script, natakdan sa kalibog. May nagbugalbugal nga si Justice Antonio Carpio ang nitalaw pero may nangugat nga sama sa arbitral ruling di mapatuman ang taphawng kadaogan sa oposisyon.
Ang nag-viral nga letrato sa bandila sa China nga nagtapot ang nawong nilang Duterte ug Xi sa protesta atubangan sa Chinese consulate sa Makati, nakapahinumdom nako sa letrato ni Duterte nga nihawok sa bandila sa Pilipinas niadtong 2016 ug sa pasidaan sa atong katiguwangan: “Ang mga traydor mohawok sa bandila ug mobukubuko sa nasud.”
- Latest
