Pamilya nga may problema

May pamilya nga kapin na sa tuig nga way tarung nga tinubdan sa panginabuhi. Napugos og lugaw aron mainat ang hapit na mabasiyo nilang bugasan. Gisabwan sa kapid-an na ka higayon ang bukog nga kataposang napalit sa merkado aron may gamayng pasumbingay sa sud-an.

Aslom nang ilang damgo kay mangatug nga nagkutoy ang tiyan. Wa malingla sa gikunis-kunis nga pang burikat nga gisundan og yarok og daghang tubig. Makaluluoy ang ilang panagway labi na sa gagmay pang mga bata. Nakahukom ang mga ginikanan nga dunay himuon sa ilang sitwasyon.

 * * *

Human sa dinalidali nga tigom sa way pagkonsulta ni bisan kinsa naumol nilang mosunod nga mga lagda: Way pasudlon ug way pagawason sa ilang bay; magsul-ob og luag nga mga sinina aron pagtabon sa mora nang tukog nilang mga bukton ug bitiis; ug, pangandam sa kahigayonan nga malilian sa mga silingan, tarungong daan ang ilang hinapay ug pasinawang mga sapatos.

Gideklarar sab nilang pakusgan ang radyo aron di madungog sa gawas ang daguok sa ilang mga tiyan. Dihang may nangahas paglalis sa mga lagda, gipasanginlang mga gahi og ulo, gisud sa sako ug gibitay.

 * * *

Bisan gitulisok ang tanang nisupak nga mga komunista, gipasabot sa mga ginikanan ang kapuslanan sa mga lagda: Kon di kasud-gawas sa bay, gamay na lang ang lihok ug di na kaayo gutmon; ang luag nga mga sinina, tarung hinapay ug sinawng sapatos moliwag sa ilang hunahuna gikan sa pagkaon ug maibanan ang kamakaluluoy.

Niinsistir nga pulos mapuslanon ang ilang mga lagda. Niangkon hinuong binuang ang pagpamugos og pases nga may pekeng QR code ug pagdili sa pagkuptanay og kamot sa publiko.

 * * *

Nisamot kaapiki ang pamilya kapin sa tuig human sa unang pagkapasmo. Pero kay nakumbinser mang kinamaayohan ang mga lagda kay silay labing utokan, niyango gihapon nga di basulon ang mga ginikanan kay mao say kahimtang sa uban (bisan nakalili nga nisugod nag lamurok ang mga aping ug tiyan sa kinadul-ang mga silingan).

Wa kahunahuna ang pamilya pagpanrabaho aron may ikapamalit sa inadlawng konsumo. Wa gani magtagad pagpananom aron may kaugalingon nang tinubdan sa pagkaon. Kon hangtod karon wa kang kaila kinsa ning pamilyaha, mao nay mas dakong katalagman.