Mas luya ang contact tracing
Hagbong ang Sugbo ug Central Visayas sa pagsubay sa tanang posible nga natakdan sa bag-ong mga kaso sa COVID-19 sa rehiyon kon basehan ang contact tracing ratio sa Inter-Agency Task Force (IATF): 36 ka close contacts sa kada pasyente sa urban areas; ug 27 ka close contacts sa kada pasyente sa rural areas.
Bisan di angkunon sa mga politiko ug sa Department of Health (DOH), mabantang ang kataphaw sa lokal nga contact tracing sa ilang gipagawas nga mga numero pila ang mga nangasakit ug sa mga nakuhaan og swab samples.
* * *
Himuon natong pananglitan ang 511 nga positibo sa 4,244 ka swab samples niadtong Marso 12, Biyernes. Kon gitinuod pa ang pag-ila sa tanang nakaduol ug posibleng natakdan sa mga pasyente, makasubay unta sila og 13,797 ka close contacts (kon isipon ang tibuok rehiyon nga rural area).
Pero pagka sunod adlaw, Sabado, Marso 13, inay madugangan nalaslasan na hinuon og 35% ang gidaghanon sa swab samples nga nakolekta ug na-eksamin sa accredited nga molecular laboratories sa Sugbo, Bohol, ug Negros Oriental ngadto na lang sa 2,768.
* * *
Nikumpisal nang DOH nga sa Metro Manila unom ra ka close contacts sa kada pasyente ang natultolan. Maong niangkon ang Malakanyang, usa ka tuig human nipahamtang sa lockdown nga kinatas-an sa tibuok kalibotan, nga ang contact tracing nagpabilin nga mao ang kinadak-ang buslot sa kampanya batok sa COVID-19.
Kay kon di dayon mailhan ang close contacts, di sila makuhaan og swab samples ug di ma-isolate. Mas dako ang kahigayonan nga makapanakod pa sila og mas daghan.
* * *
Hilom ang lokal nga mga opisyal sa ka-agresibo sa ilang contact tracing. Pero nabisto nga mas luya sila kay sa taga Metro Manila base ra gihapon sa ilang kaugalingong mga numero:
• Niadtong Marso 13, lima (5.4) ra ka close contacts ang ilang nasubay sa kada usa sa 511 ka kaso sa Marso 12;
• Niadtong Marso 14, upat (4.4) ra ka close contacts ang nasubay sa kada usa sa 397 ka kaso sa Marso 13; ug
• Niadtong Marso 15, upat (4.1) ra ka close contacts ang nasubay sa kada usa sa 275 ka kaso sa Marso 14.
- Latest
