Nganong supak sa Sinovac
Ato ning klaruhon: Bisan 50% ra ang ka-epektibo sa bakuna sa Sinovac sa pagsagang sa COVID-19, suma sa pagtuon sa independente nga mga eksperto nga gikonsulta sa Food and Drug Administration (FDA) sa Pilipinas, mas maayo gihapon siya kay sa way bakuna.
Sa ato pa, kon magpabakuna ka og Sinovac, bisan sa tanang pagduda ug panagana sa kanihit sa kasayuran giunsa paghimo sa China ang pagtuon ug pagseguro sa kaluwas ini para sa mga pasyente, mas dako ang imong panalipod gikan sa kagaw kay sa imong mga kaila nga di magpabakuna.
* * *
Pero klaruhon sab ni nato: Kay 50% ra man ang iyang ka-epektibo, katunga ra sa hulga nga matakdan sa COVID-19 ang mabaraw, mameligro gihapon ta sa laing katunga. Labing yano nga pagpasabot sa mga eksperto mao nga sa kada duha nga mabakunahan sa Sinovac, usa ra nila ang mapanalipdan kay ang ikaduha masakit.
Mao nga di mabasol ang katawhan nga, bisan sa kadinalian sa panginahanglan sa paglingkawas gikan sa pandemya aron nga mahibalik na ang naandan nga mga panginabuhi ug negosyo, magpaabot sa ubang mga bakuna nga mas epektibo.
* * *
Kinadak-an nga problema sa Sinovac mao nga ang tulo ka bakuna nga nag-una niya nga gitugotan sa Estados Unidos, Britanya, Pilipinas, ug ubang kanasuran, pulos mas epektibo: 95% ang bakuna sa Pfizer ug BioNTech; 94.1% ang sa Moderna; ug 70% ang sa AstraZeneca. Bisan ang kadungan nga bakuna sa Russia, Sputnik V, 92% ang ka-epektibo.
Maong way bisan usa sa mga siyudad ug probinsiya sa Pilipinas nga kinaunahan nga nakapirma og mga kontrata pagpangompra og mga bakuna ang nisugal sa Sinovac, kasagaran nila nipili sa AstraZeneca.
* * *
Wa sab katabang sa Sinovac ang makalibog nga postura sa pamunoan ni Presidente Rodrigo Duterte sa pagdasig sa katawhan pagsalig sa bakuna:
• Human nipasidaan ang kadagkoan sa FDA nga ang Sinovac di makapanalipod sa health workers nilikoy tungod sa pagpangisog sa Malakanyang ug nipasalig na nga mahimo ra silang magpabakuna ini; ug
• Nagdumili pagpabakuna sa Sinovac silang Health Secretary Francisco Duque, 64 anyos, ug Defense Secretary Delfin Lorenzana, 72 anyos, tungod sa ilang pangedaron apan gipahibawo sa Malakanyang nga magpabakuna si Presidente Duterte nga 75 anyos na.
- Latest
