Dul-an sa oras nga pakauwaw

Di maayong ipanabi ning akong kasinatian. Apan nagmatuod ni nga bisan sa kalapad sa iyang kasinatian, katag-as sa nahuptang katungdanan ug kadako sa iyang katigayonan, lisod labwan ang kamapailubon ug kamasinabuton ni Dr. Jose “Sir Dodong” Gullas.

Di na kong kahinumdom unsa tong tuiga, pero liwas sa Piyesta Senyor nga gitawgan ko sa iyang buhatan uban ang imbitasyon nga paadtuon sa iyang bay uban sa taga Freeman. Kay sa bukirang barangay sa Guba, Cebu City, pa man siya nagpuyo, gipakuha kong Sir Dodong sa iyang sakyanan gikan sa gialagaran nakong sibyaanan sa Jagobiao, Mandaue City.

***

Labihang sayoha nakong niabot sa iyang pinuy-anan nga wa pay laing nagtikaw-tikaw gawas sa iyang asawang si Ma’am Nena ug ilang mga katabang. Morag daghan kaayo silang giatiman. Pero si Sir Dodong sa naandan niyang kamaabi-abihon niatubang nako.

Samtang nag-istorya mi, kabantay kong Ma’am Nena ug sa mga katabang nga makahuloganon nga nagsige og pasiplat namo. Bisan si Sir Dodong morag napugos lang og tubay. Pero kay naikog man kong mangutana unsay mitingan, bisan unsa na lay among giistoryahan.

***

Nangutana siya aktibo ba sa politika ang akong mga paryente sa Talisay City, unsay panginabuhi sa akong mga ginikanan, pila ming magsuon ug giunsa nako pagsugod sa radyo. Nibawos sab ko og pangutana sa giunsa niya pagsugod ug unsa pa ang iyang mga plano sa Freeman.

Bisan sa kamaayo niyang managad, nakabatyag ko nga may lain siyang gipaabot. Nga may angay kong isulti niya apan bisan giunsa nako og hunahuna wa g’yud mahinumdomi. Human sa dul-an sa oras, natubag ang nagngutngot nakong pagduda dihang nangabot nang taga Freeman.

***

Mora kong naupos sa lingkoranan dihang layo pa gani sa pultahan ang mga kawani sa Freeman nitimbaya nag “Happy birthday, Sir Dodong!” Nganong wa may nakapahibawo nako sa espesyal nga okasyon?

Ang tubag mao nga si bisan kinsang maghilas-hilas og suwat sa The FREEMAN angay untang mahibawo, o mahinumdom, sa petsa sa birthday sa founder ug chairman. Apan wa pakita og timaan si Sir Dodong nga nalain siya. Wa gani niya pahibaw-a ang ubang mga bisita sa akong atraso. Apan sa nisunod nga katuigan gihatagan ko niya sa tanang kahigayonan pagbawi sa pakauwaw.