Pabilo sa kalibotang kaguliyang
Mahimo nga di mahinayon ang gisaad nga bahin sa Sugbo sa 20 milyones ka doses sa bakuna sa Moderna nga gipasalig sa negosyanteng si Enrique Razon nga iyang hakuton nga libre gikan sa pabrika sa Espanya paingon sa Pilipinas.
Gipahibawo ang mga negosyante sa Sugbo nga nagpareserba na unta alang sa ilang mga kawani ug mga sakop sa pamilya nga nitaas nang presyo tungod sa kadaghan sa nagpalista sa Metro Manila. Ang orihinal nga presyo nga $26 (P1,250) matag dose nisaka na ngadto sa $42 (P2,020) matag dose.
* * *
Kabahin lang hinuon ni sa kalibotanong kayagaw sa pagpamakuna batok sa COVID-19. Nihulga nang Italya sa pagkiha sa Pfizer/BioNTech tungod sa kalangay paghatod sa gibayran nang bakuna. Nireklamong Turkey ug Brazil sa kapakyas sa Sinovac paghatod sa ilang CoronaVac.
Nasuko ang European Union (EU) sa pahibawo sa AstraZeneca ug Pfizer/BioNTech nga di silang kapada sa gipasalig nga gidaghanon sa bakuna sa gitakda nga panahon. Ug nagkadaghan ang mga nasud nga nitiyabaw nga mas taas ang presyo nga gipahamtang sa mga kompaniya sa tambal nila kay sa ubang kanasuran.
* * *
Nanukad ang panagsungi sa pag-insistir sa mga kompaniya sa tambal sa pagtago sa mga detalye sa mga kontrata sa ilang mga bakuna: Di nila ipatug-an ang presyo nga nasabotan sa matag dose sa bakuna ug ang gidak-on sa pasiuna nga bayad; ug di sab sila motino kanus-a mahatod ang mga bakuna.
Tungod sa kadinalian sa panginahanglan sa bakuna, napugos ang mga nasud pagtak-om sa mga kontrata nga ilang gipirmahan. Bisan ang Covax sa World Health Organization (WHO) niapil sa pagpakahilom.
* * *
Apan ang mga opisyal sa gobyerno nikisikisi na kay silay gihan-okan sa kasuko sa katawhan sa kalangay sa mga bakuna. Ang pagkabisto sa kataas sa presyo nga ilang gibayran kay sa ubang kanasuran nakaputos sab nila sa mga pasangil sa pangurakot.
Ang pagpaburot sa presyo sa pasiunang bakuna sa Moderna alang sa Sugbo ug ubang bahin sa Pilipinas tipik lang sa nitumaw nga kinadak-an nga eskandalo sa pandemya: Inay maghiusa ug magtinabangay pagluwas sa mga kinabuhi ug mga panginabuhi, nagpuhalay ang mga tagduma sa kanasuran ug nagpabusdik sa ginansiya ang mga kompaniya sa tambal.
- Latest
