Nangalisbong eskandalo sa bakuna
Lubat-lubatan ang mga sakop sa Presidential Security Group (PSG), Armed Forces of the Philippines (AFP), ug gabinete nga namintaha sa pag-una-una pagpabakuna batok sa COVID-19 sa pasidaan sa mga eksperto sa Taiwan nga ang bakuna sa Sinopharm o China National Pharmaceutical Group Corp. maoy labing kuyaw sa tibuok kalibotan.
Angay hinuon natong klaruhon nga ang Taiwan way bilib sa China. Nagpadayon ang ilang away tungod sa pagpamugos sa China nga ilang lalawigan ang Taiwan ug ang deklarasyon sa Taiwan sa ilang kagawasan sa China. Nagkasungi nilang mga lagda sa COVID-19 nakapasamot pa g’yud sa ilang bugno.
***
Mga eksperto sa Taiwan maoy nibutyag sa 73 ka side effects sa bakuna nga gilista sa instruction manual sa Sinopharm. Naglakip sa pagtaas sa presyon sa dugo, pag-awop sa panan-aw ug pagkawagtang sa katakos sa pagtagamtam sa timpla.
Ambot unsaon pagpatuman ni Health Secretary Francisco Duque III ang iyang awhag sa PSG sa pagsumiter og binuwan nga taho sa kahimtang sa panglawas sa mga nabakunahan. Kon giduphan ni Presidente Rodrigo Duterte ang PSG gikan sa imbestigasyon sa Senado, madutlan kaha sila sa sugo sa Department of Health (DOH)?
***
Ubang side effects nga gilista sa Sinopharm sa ilang bakuna nga wa pay pagtugot gikan sa Food and Drug Administration (FDA) sa Pilipinas hangtod karon: Sakit, paghubag ug pagkatol sa bahin sa bukton nga gitusokan sa bakuna; labad sa ulo; hilanat; pagsakit sa kaunoran; kalisod sa pagginhawa; ug pagbasa sa hugaw.
Nipasidaan sab ang Sinopharm sa mosunod nga panagsa nga negatibong mga epekto: Hubak, paghubag sa tutonlan, pagsakit sa mata, pagkabuta, pagsakit sa dunggan, di kapugngan sa pagpangihi ug kalangay sa binuwan nga dugo sa kababayen-an.
***
Bisan sa pagsupak sa presidente, ihinayon sa Senado ang imbestigasyon sa ilegal nga pagpamakuna sa PSG, AFP, gabinete, ug sa 100,000 ka trabahante gikan sa Mainland China sa Philippine Offshore Gaming Operations (POGOs).
Sa pikas nga bahin, giawhag ang kadagkoan sa Sinopharm, nga gipanag-iya sa gobyerno sa China, sa pagpatin-aw kinsa ang nagpayuhot sa ilang mga bakuna sa Pilipinas, kinsa ang naghatag sa mga bakuna ngadto sa PSG, AFP, gabinete, ug POGOs ug unsa kaluwas ang mga bakuna nga wa pa masubli sa FDA.
- Latest
