2024 mahingpit ang pagpamakuna
Sa iyang pag-insistir nga di maiwit ang Pilipinas sa pagpamalit sa mga bakuna batok sa COVID-19, ang gitudlo ni Presidente Rodrigo Duterte nga vaccine czar nga si Heneral Carlito Galvez nipasalig nga mabakunahan na ang 50 milyones ka Pilipinhon sunod tuig.
Niangkon hinuon si Galvez nga, bisan gihatagan siya sa gahom sa pagsud og mga transaksiyon ug pagbayad nang daan bisan wa pa mahatod ang mga bakuna, wa pa siyay napirmahan nga kontrata uban sa mga nasud ug mga kompaniya nga naghimo sa mga bakuna nga napamatud-ang luwas ug epektibo.
***
Apan bisan istorya pa lang ang gipasikaran wa papugong si Galvez sa pagbutyag na sa publiko sa iyang banabana sa gidaghanon sa pasiunang mga bakuna gikan sa nagkalainlaing tinubdan:
- 20 milyones ka doses gikan sa Sinovac sa China;
- 20 milyones ka doses gikan sa Pfizer ug BioNTech;
- 20 milyones ka doses gikan sa University of Oxford ug AstraZeneca.
Gilista na sab niya ang unang mabakunahan: 1.7 milyones ka health workers; 9.3 milyones ka senior citizens; 13 milyones ka labing kabos; ug tunga sa milyon ka polis ug sundawo.
***
Tungod sa kataas sa demanda ug kanihit sa pasiuna nga suplay sa mga bakuna, nikumpisal si Galvez nga may kahigayonan nga makaabot sa Pilipinas ang unang hugna sa mga bakuna unya na sa sinugdanan sa 2022.
Matod niya 20 ngadto sa 30 milyones ka doses ang makompra sa Pilipinas matag tuig. Ug busa mahimong maabtan sa 2024, duha ka tuig human mapupos ang termino ni Presidente Duterte, ang pagkompra sa gikinahanglang 140 milyones ka doses.
***
Ang 140 milyones ka doses sa mga bakuna maoy girekomendar sa Department of Health (DOH) aron kahatagan og tagduha ka doses ang 70 milyones ka Pilipinhon, nga maoy gibanabanang makahatag og herd immunity batok sa COVID-19.
May gamayng problema ang plano ni Galvez: Kay gipaspasan man ang clinical trials, wa pa mahibaw-i ang lahutay sa panalipod sa mga bakuna; kon matinuod ang kabalaka nga kutob ra sa unom ka buwan o usa ka tuig, magpahigayon na ang ubang kanasuran sa ikaduhang hugna sa ilang pagpamakuna samtang ang Pilipinas wa pa makahingpit, mahimong wa pa gani makatunga, sa unang hugna.
- Latest
