Ug sa kalit lang may upat ka bakuna
Sa kapaspas sa pagmugna og mga bakuna batok sa COVID-19, sa akong pagsuwat ini duna nay upat nga nangayo og pagtugot sa lapad nga pagpamakuna, mahimong mataligam-an na nato nga pila pa lang ka buwan ang nilabay gipasidan-an ta sa mga eksperto sa kahigayonan nga way bisan usa ka bakuna nga mahimo.
Pulos pakyas ang nangagi nga mga pagsuway sa pagmugna og bakuna batok sa coronavirus. Nitahan ang mga siyentipiko sa nagkalainlaing kanasuran nga labihang lisora ang pagpangita og panagang bisan batok sa kasarangan nga sip-on.
* * *
Di tinuod makadasig ang pagsubay sa kasaysayan sa mga paningkamot pagasagang sa kagaw:
• Kapin na sa tulo ka dekada human nailhi ang HIV (Human Immunodeficiency Virus), ang kagaw nga mosangpot sa AIDS (Acquired Immunodeficiency Syndrome), wa pa gihapoy bakuna nga namugna;
• Nailhan ang dengue niaging 1943, o 77 ka tuig nang nilabay, apan ang labing unang bakuna gitugotan sa niagi lang tuig, nga nakapa-apiki pa gani sa mga pasyente nga wa pa sukad matapti og dengue; ug
• Ang kinapaspasang bakuna namugna sud sa upat ka tuig --batok sa bayuok.
* * *
Labing uwahi nga kapakyasan nahiagoman sa lapad nga mga pagtuon pagmugna og bakuna batok sa SARS (Severe Acute Respiratory Syndrome) niadtong 2003 ug MERS (Middle East Respiratory Syndrome) niadtong 2013:
• Ang SARS hingpit nga napapas human sa walo ka buwan; samtang
• Ang MERS wa kagawas sa mga nasud sa tungatungang sidlakan.
Nakatabang hinuon ang napakyas nga mga pagtuon sa SARS ug MERS. Kay igo na lang gisumpayan sa mga laboratoryo, wa na sila magsugod sa wa.
* * *
Maong angayng hangpon nga, 11 ka buwan human niulbo ang pandemya, di lang usa, di lang duha, di lang tulo, kon dili upat ka kandidatong bakuna ang nangangkon og kalamposan sa Phase 3 sa ilang clinical trials:
• Ang Pfizer sa Estados Unidos ug BioNTech sa Germany nangangkon nga 90% nga epektibo ang ilang bakuna;
• Ang Moderna sa Estados Unidos nangangkon nga 94.5% nga epektibo ang ilang bakuna;
• Ang University of Oxford ug AstraZeneca sa Britanya nangangkon nga 90% nga epektibo ang ilang bakuna; ug
- Ang Gamaleya Research Institute of Epidemiology and Microbiology sa Russia niangkon nga 95% nga epektibo ang ilang bakunang Sputnik V.
- Latest
