Nganong nisulbong pagbalik

Human sa pila ka semana nga malampusong pagpahinay sa tinakdanay sa kagaw, nisulbong pagbalik ang mga kaso sa COVID-19 sa Sugbo ug nahimutang na sab sa inadlaw nga listahan sa Department of Health (DOH) sa mga dakbayan ug lalawigan nga kinadaghanan og bag-ong mga kaso sa tibuok nasud.

Nisaka sab ang positivity rate sa Sugbo lapas sa gitakda sa World Health Organization (WHO) nga 5% nga maoy magtimaan nga sakto na ang gidaghanon sa swab tests ug nga nagsugod na ang pagkontrolar sa pagkatap sa kagaw sa kabalayan ug kabaranggayan.

 * * *

Ang Dakbayan sa Sugbo (59) ug Lalawigan sa Sugbo (51) ang gigikanan sa mayoriya (69%) sa 160 ka positibong kaso nga napamatud-an sa mga laboratoryo sa Sugbo ug Central Visayas. 158 (99%) sa bag-ong mga kaso ang gikan sa Sugbo ug ang nahibiling duha (1%) gikan sa Bohol. Way bisan usa ka bag-ong kaso sa Negros Oriental ug Siquijor.

Makapabalaka sab ang pagdaghan sa mga kaso sa Dakbayan sa Lapu-Lapu (30) ug sa Dakbayan sa Mandaue (18) nga nakatampo sa 30% sa bag-ong mga kaso sa tibuok rehiyon.

 * * *

Human gipasidunggan nga maoy epicenter sa recovery sa COVID-19, nahibalik ang Dakbayan ug Lalawigan sa Sugbo sa listahan sa DOH sa kinadaghanan og mga kaso sunod sa Laguna (84), Dakbayan sa Davao (81), Cavite (73), Quezon (71) ug Rizal (64).

Laing di maayo nga numero nga gipagawas sa DOH: Nisaka ngadto sa 7.8% ang positivity rate (160 ang nag-positibo sa 2,039 ka swab tests) niadtong Sabado, Nobyembre 14. Mas taas sa nasudnong positivity rate nga 6% (1,182 ang nag-positibo sa 19,531 ka swab tests) sa samang adlaw.

 * * *

Posibleng katin-awan sa pagdaghan sa mga kaso sa Sugbo ug padayong tinakdanay sa ubang bahin sa nasud mao ang kakuwang sa swab testing. Bisan pa sa pila ka buwan nang pasalig, wa gihapon maabot ang gipasalig nga inadlawng kapasidad sa mga laboratoryo: 6,000 sa Central Visayas ug 30,000 sa tibuok nasud.

Kon kuwang ang swab testing, di dayon matultolan ang mga nataptan, di dayon matambalan, di dayon masubay ang ilang natakdan ug di dayon ma-isolate sa di pa makapanakod sa mas daghan.