Managlahi nga banabana sa hangin

Sa makausa pa, nipatumaw sa lapad nga kalibog ang managlahi nga sukod ug banabana sa gikusgon sa hangin sa bagyong Rolly dayong sud sa Philippine Area of Responsibility (PAR) hangtod sa pagkusukuso ini sa Luzon nga giluwatan sa:

• Philippine Atmospheric Geophysical and Astronomical Services Administration (PAGASA), nga nagbase sa nagkalainlaing rehiyon sa Pilipinas, ang opisyal nga tigbantay sa kahimtang sa panahon sa nasudnong gobyerno; ug

• Joint Typhoon Warning Center (JTWC) nga nagbase sa Pearl Harbor, Hawaii nga hinugpong nga giduma sa United States Navy ug sa United States Air Force.

 * * *

Ang JTWC sayo kaayo nga nipasidaan nga mahimong super typhoon si Rolly kay ang kinakusgan nga huros sa hangin mahimong moabot sa 270 ka kilometro matag takna, mas kusog sa 220 ka kilometro matag takna nga gitakda sa PAGASA sa kategoriyang super typhoon.

Sa pikas nga bahin, niinsistir ang PAGASA nga samtang labihan kakusog sa hangin ni Rolly, ang ilang kahimanan nagtumbok nga di molapas sa 215 ka kilometro matag takna ang kinakusgang hangin inig sud sa PAR ug mahimong mohinay pa gani kon mobangga na sa landmass sa Luzon.

 * * *

Unang timaan sa pag-usab sa PAGASA sa ilang banabana mao ang pag-angkon niadtong Sabado sa gabii, pila ka takna sa wa pa mo-landfall si Rolly sa Bato, Catanduanes, gahapon sa kadlawon, nga si Rolly mahimong mao nay kinakusgang bagyo sa tibuok kalibotan karong tuiga, bisan duha ka buwan pay nahibilin sa 2020.

Nahingpit ang kauwawan sa PAGASA dihang mas nikusog si Rolly human nibangga sa yuta sa Luzon ug niabot og 225 ka kilometro matag takna ang kinakusgang hangin ug 310 ka kilometro matag takna ang pag-unos.

 * * *

Wa kapapas sa pagpanlipaghong sa dagway sa kadagkoan sa PAGASA ang ilang pasalig nga mas daghan og kahimanan dinhi sa nasud kay sa JTWC ug busa mas kasaligan ang ilang mga banabana sa kahimtang sa panahon sa Pilipinas.

Wa katabang ang naandan nilang katin-awan nga igo lang nisunod ang Pilipinas sa mga lagda sa World Meteorological Organization (WMO) nga may 190 ka sakop nga nasud (ang JTWC di sakop) ug nga mas sagunson ang sukod sa hangin sa JTWC (matag gutlo) kay sa PAGASA (matag 10 ka gutlo).