Nitidlom ang tests di ang mga kaso

Unang pasalig sa Malakanyang nga bayran sa labing daling panahon ang P930 milyones nga utang sa Philippine Health Insurance Corporation (PhilHealth) sa Philippine Red Cross (PRC). Ikaduha nilang pasalig nga bayran ang katunga sa utang niadtong Biyernes, Oktubre 23. Ikatulo nilang pasalig nga bayran ang tibuok utang niadtong Lunes, Oktubre 26.

Napupos ang mga tagal, way natuman sa mga saad. Kini bisan gipatigbabaw sa Department of Justice ang legalidad sa kauyonan nga bayran sa PhilHealth ang PRC sa swab tests sa iyang mga sakop ug sa Overseas Filipino Workers (OFWs).

 * * *

Nipasalig ang Malakanyang nga mabayran dayon ang PRC tungod sa tiyabaw ni Labor Secretary Bebot Bello sa niaging semana nga kapin na sa 6,000 ka OFWs ang natanggong sa isolation facilities sa Metro Manila tungod sa kalangay sa resulta sa swab tests human nihunong pag-atiman nila ang mga laboratoryo sa PRC.

Apan nakiglambigit nang Department of Health (DOH) sa walo ka pribadong laboratoryo nga mopuli sa PRC. Klarong gitumong pagpakalma sa OFWs sa way pagbayad sa dakong utang nga sa labing uwahing ihap niabot na og P1.1 bilyones.

 * * *

Nibutyag hinuon ang mga eksperto nga gawas sa OFWs ug PRC, mas naapiki sa utang sa PhilHealth and kinatibuk-ang kampanya batok sa COVID-19. Kay katunga sa naandang gidaghanon sa swab tests sa Metro Manila ang nawagtang dungan sa pagpanira sa mga laboratoryo sa PRC sa OFWs ug sa mga sakop sa PhilHealth.

 Sa ato pa, ang gipasigarbo sa DOH nga pagtidlom sa mga kaso sa Metro Manila sa nangaging mga adlaw mahimong di tungod sa paghinay sa tinakdanay kon dili tungod sa pagtidlom sa gidaghanon sa swab tests.

 * * *

Kon hangtod karon molalis gihapong pamunoan ni Presidente Rodrigo Duterte sa kamapuslanon sa mass testing, angay’ng pahinumdoman nga swab tests ang makatultol sa mga masakiton aron matambalan sa di pa mograbe ug masubay ug mabuwag ang tanang close contacts sa di pa makapanakod sa mas daghan.

Busa inay ibanan angayng pun-an ang PCR laboratories, labi na sa Mindanao nga labing nagkuwang sa swab testing. Gawas sa pagbayad sa PRC, angayng tabangan ang local government units ug pribadong sektor pagtukod og dugang laboratoryo ug pagpalambo sa mga tambalanan.