Mahimong 34% ray mapanalipdan
Gawas sa nalantawan nang daan nga kalisod sa pagpamakuna batok sa COVID-19 gikan sa paglaslas sa pamunoan ni Presidente Rodrigo Duterte sa gahin pagpamalit og bakuna (P12.9 bilyones unta ang gipangayo sa Department of Health apan P2.5 bilyones ra ang gigahin) ngadto sa kakuwang sa cold storage facilities nga katipigan sa mga bakuna may laing gimbuhaton nga angayng tutokan na sa gobyerno sa labing daling panahon:
Ang pagkumbinser sa katawhan sa kamapuslanon sa pagpabakuna atubangan sa hiningusgang kampanya paghilo sa ilang panghunahuna nga ang mga bakuna mosangpot sa mas grabeng mga sakit.
* * *
Sa pagtuon sa Unicef (United Nations Children’s Fund), nitidlom pag-ayo ang gidaghanon sa mga bata nga nabakunahan sa Sugbo ug ubang bahin sa Pilipinas gikan sa 87% niadtong 2014 ngadto sa 68% na lang sa niaging tuig 2019.
Nisangpot ni sa pagsulbong og 130% sa mga bata nga nataptan sa kalikayan untang sakit sa tipdas sa 2019 kon itandi sa samang higayon sa 2018. Tungod sa nagkadakong bahin sa populasyon nga wa mabakunahi, nitumaw sab pagbalik sa Luzon ug Mindanao ang mga kaso polio nga hagbay ra untang napapas.
* * *
Kon igo lang maambasan ang gidaghanon sa mga bata nga nabakunahan batok sa ubang mga sakit, mas gamay pa gani ang mga dagko nga nagpabakuna batok sa flu matag tuig, mahimong di ta makamugna og igong panagang batok sa COVID-19.
Kon sundon sa Pilipinas ang lagda sa Food and Drug Administration (FDA) sa Estados Unidos nga 50% ra nga ka-epektibo ang pasikaran sa pagtugot sa mga bakuna, 34% ra sa mga Pilipinhon (50% sa 68%) ang mapanalipdan.
* * *
Nahibawo si Presidente Duterte kinsay nangampanya batok sa bakuna. Iyang mga alyado ang namolitika sa bulilyaso sa Dengvaxia --gibasol nilang bakuna bisan sa mga kamatayon nga napamatud-ang lain ang hinungdan-- busa mas nilapad ang naandang mga panagana.
Samtang wa dasoni sa presidente ang kampanya, nga gilusad sa Public Attorney’s Office ginamit ang pundo sa gobyerno bisan way pagtugot sa Department of Budget and Management, wa siya mamadlong. Dihang giawhag niyang mga ginikanan pagpabakuna sa ilang mga bata, nisulbong nang tipdas ug nahibalik nang polio. Hinaot may igo pang panahon pagkumbinser sa katawhan sa kakasaligan sa umaabot nga mga bakuna.
- Latest
