Kahaguka ug kataphaw sa liderato

Niang labing bag-o nga ebidensiya sa ka way liderato sa kampanya batok sa Covid-19, nga maoy gitumbok nga kinadak-an nga hinungdan sa kapakyas sa Pilipinas sa pagkontrolar sa tinakdanay bisan sa unom na ka buwan nga pagtanggong sa mga molupyo sa ilang kabalayan, nga nisangpot sa pagkapilde sa minilyon ka panginabuhi ug pagkahagsa sa ekonomiya:

Panaglalis sa mga haligi sa Inter-Agency Task Force (IATF) batok sa Covid-19 kon gitugotan ba ug kon makatabang ba sa kampanya ang pag-iban sa tagsa ka metrong gilay-on sa mga manglingkod sa mga sakyanang pamasahero.

* * *

Nangangkon si Transportation Secretary Arthur Tugade nga gitugotan sa IATF ang anam-anam nga paglaslas sa gilay-on sa mga pasahero: Ang usa ka metro gihimong 0.75 meter sugod niadtong Lunes, Septiyembre 14; himuong tunga sa metro sugod unya sa Lunes, Septiyembre 28; ug himuon pa gyong 0.3 meter sugod unya sa Oktubre 12.

Apan ang kusganon nga pagkisikisi sa mga kauban ni Tugade sa IATF nipatumaw sa kahigayonan nga wa matarung sa pagtuki ug labaw nang wa pa maaprobahi ang kontrobersiyal nga lagda sa Department of Transportation (DOTr).

* * *

Si Health Secretary Francisco Duque III nidason sa pasidaan sa mga kahugpongan sa mga doktor nga ang panagduol sa mga pasahero mahimong mosangpot sa paspas ug lapad nga tinakdanay ug sa pagsulbong pagbalik sa mga kaso sa tibuok nasud.

Mas isog si Interior Secretary Eduardo Ano. Kinsa nipasangil sa DOTr nga nagbuotbuot lang sa pagpatuman sa lagda sa way pagpananghid sa tibuok IATF ug busa angayng bakwion sa labing dali nga panahon.

* * *

Pulos mga suod ug sinaligan ni Presidente Rodrigo Duterte silang Tugade, Duque ug Ano. Nga wa mahusay sa mga tigom sa IATF ug nga gipiyestahan na hinuon sa publiko ang ilang panagsungi maoy nadugang sa nagkataas nang listahan sa pag-iyahay sa mga opisyal tungod sa pagdumili sa presidente sa pagpangu sa kampanya batok sa Covid-19.

Kay ang presidente kutob ra man sa pagpadayag sa pagduda sa kaseryuso sa kagaw sa pagsugod sa pandemya niadtong Marso ug sa pagsige og pasalig sa bakuna human sa tunga sa tuig, ang iyang mga sinaligan nakapatuyang sa pagpalabwanay sa ilang kahawod inay sa pagpanalipod sa kahimsog sa publiko.