May bakuna nang wa mahibaw-i
Atubangan sa kaliboan ug usa ka kakulian sa pagmugna og bakuna batok sa Covid-19 pagharab-harab sa mga politiko, pagpanglaktod sa pipila ka nasud, posibleng pagtumaw sa dugang mga komplikasyon nga makapalangay o makapabasura gyod sa mga pagtuon ug ang pasidaan nga mahimong 2025 pa mahimo ang 15 bilyones ka doses nga maoy gikinahanglan aron nga may panagang nang kinabag-an sa kalibotanong mga molupyo gikan sa kagaw--may masaarong alternatibo nga gitun-an ang mga espesyalista:
Nga, mahimong wa lang mahibaw-i sa kadaghanan, duna nay bakuna nga nanalipod nato gikan sa Covid-19, ang face masks.
* * *
Gisusi karon sa mga eksperto sa nagkalainlaing kanasuran sa kalibotan ang kahigayonan nga natakdan na sa SARS-Cov-2 ang mas daghang molupyo apan tungod sa ilang face masks parsiyal nga nasangga ang kagaw ug mas ubos ang viral load nga nakasud sa ilang baba ug ilong ug busa:
Wa sila mopakita og mga timaan sa sakit o kon nangasakit man nagtuo lang nga gitakboyan og kasarangang sip-on ug ubo; ug
Ang presensiya sa kagaw sa ilang ginhawaan nakapalihok sa ilang immune system nga nakamugna og antibodies nga takos nang mobaraw sa sunod nga higayong makasud ang mas daghang kagaw.
* * *
Segun sa mga espesyalista may nagkadaghan nga timaan nga sama sa tinuod nga mga bakuna nga pinasikad sa huyang nga bersiyon sa mga kagaw, ang mga molupyo napanalipdan sa face masks ug busa makalingkawas sa kinatibuk-ang kadaot ug bangis nga mga komplikasyon sa Covid-19.
Ang nagkadaghang nasud nga nipahamtang sa panginahanglan sa face mask sa publikong mga dapit gituohan sa mga eksperto nga nakatampo sa pagsulbong sa gidaghanon sa mga pasyente nga nataptan sa Covid-19 apan wa mopakita og mga timaan sa sakit.
* * *
Nadasig ang mga espesyalista sa pasiunang mga pagtuon sa mga hayop: Ang mga gipatakdan sa mas daghang kagaw nahiagom sa mas grabeng epekto sa Covid-19; apan ang mga gipasul-ob og face masks mas gamay ang kahigayonan nga natakdan ug ang mga natakdan way timaan sa sakit o mas huyang ang epekto.
Nitaho sab ang Estados Unidos ug ubang kanasuran nga niadtong Hulyo 40% sa mga nangasakit ang asymptomatic apan dihang gipamugos na ang face masks ang mga asymptomatic nisulbong ngadto sa 80%.
- Latest
