Mas makiangayong bakuna
Human lang sa pila ka adlaw, wa gani maabti og usa ka semana, gitugotan ang pagpadayon sa kataposang hugna sa clinical trials sa usa sa nag-una nga kandidatong bakuna batok sa COVID-19, ang Oxford vaccine sa AstraZeneca.
Samtang wa gihapoy gibutyag nga mga detalye unsay sakit nga nitakboy sa pasyente, nga maoy nakapahunong sa pagtuon sa niaging semana, ang gihimo sa AstraZeneca nakamatuod nga gipalabi nila ang kaluwas. Sa pikas nga bahin, nakapatumaw sab hinuon sa dugang mga huhungihong gikan sa mga pundok nga way pagsalig sa mga bakuna.
* * *
Ang haw-ang sa kasayuran tungod sa panginahanglan sa pagtago sa mga detalye sa mga boluntaryo sa clinical trials, nga sa kaso sa AstraZeneca niabot na og 18,000 ang nabakunahan sa Britanya, Estados Unidos, Brazil, ug South Africa, wa ra hinuon sa kumingking sa kamisteryuso sa mga pangangkon sa bakuna sa Russia ug China:
• Si Russian President nikalit og pahibawo niadtong Agosto nga may bakuna na bisan wa pay Phase 3 trials; ug
• Ang People's Liberation Army sa China namakuna sa iyang kasundalohan ug health workers bisan wa pa say Phase 3.
* * *
Ang kasinatian sa AstraZeneca nakahinumdom sab sa kalibotan nga bisan sa kadaghan sa kandidatong bakuna (176, segun sa World Health Organization) ug sa mga naa na sa Phase 3 (walo), wa pa gihapoy garantiya nga may bakuna na batok sa COVID-19.
Pasidaan sab ni sa mga pangu sa kanasuran sama ni Presidente Rodrigo Duterte nga nagsige nag pasalig og bakuna. Mas mapuslanon ang pagpadayon sa kalibotanong pagmatngon --face mask, physical distancing, ug panghunaw.
* * *
Bisan kinsa pay molampos sa paghimo og bakuna o mga bakuna ug bisan kanus-a pa, ang sunod nga hagit mao ang pagpatuman sa labing paspas ug labing makiangayon nga pag-apud-apod sa panagang sa pandemya. Mas kalaoman ang United Nations nga naningkamot nga unang mabakunahan ang mga nasud ug katawhan nga labing nagkinahanglan.
Hinaot nga paluyohan sa mas daghang kanasuran atubangan sa law-ay nga pagpaneguro og ila sa Estados Unidos, Britanya, ug ubang adunahang kanasuran nga nisipong nang daan sa wa pa tugoting mga bakuna ug pagpanghagad sa China nga piskan sa ilang mga bakuna si bisan kinsa nga motila sa ilang lapalapa.
- Latest
