Pagkapandol sa lumba sa bakuna
Ang higanteng kompaniya nga AstraZeneca, nga gipaabot nga maoy labing unang mopahibawo karong semanaha kon may bakuna na ba batok sa COVID-19, nipakugang sa kalibotan sa ilang paghunong sa clinical trials sa ilang “Oxford Vaccine” tungod sa wa mapasabot nga pagkasakit sa usa sa mga boluntaryo nga nagpabakuna.
Matud sa AstraZeneca nga maoy kaabag sa University of Oxford sa United Kingdom boluntaryo ang ilang paghunong aron kahatagan og higayon ang pagsubli sa kaluwas sa bakuna pinaagi sa independente nga komitiba sa mga eksperto.
* * *
Samtang wala mohatag og dugang detalye, niangkon ang kompaniya nga seryuso ang sakit apan wa mameligro ang kinabuhi sa pasyente. Ang kasagaran sa mga epekto sa bakuna mao ang hilanat, labad sa ulo ug pagpanakit sa kaunoran.
Nisunod ang pahibawo sa AstraZeneca sa makasaysayanon nga pagpirma sa siyam ka higanteng kompaniya sa pasalig nga ipatigbabaw ang mga lagda sa kaluwas ug ka-epektibo sa ilang mga pagtuon bisan sa kadinalian sa panginahanglan sa bakuna batok sa Covid-19.
* * *
Nipirma sa kauyonan ang chief executive officers (CEOs) sa AstraZeneca, BioNTech, GlaxoSmithKline, Johnson & Johnson, Merck, Moderna, Novavax, Pfizer ug Sanofi. Wa maapil sa kauyonan ang mga kompaniya sa China ug Russia nga may gihimo sab nga mga bakuna.
Nipasalig ang siyam ka kompaniya nga di nila budhian ang pagsalig sa publiko sa kaligdong ug kakuti sa proseso sa pagmugna og mga bakuna. Nakapahupay ang ilang kauyonan sa kabalaka nga magpagamit sila sa pamolitika sa mga pangu sa kanasuran nga naghigwaos og bakuna.
* * *
Samtang nitidlom ang kahigayonan nga ang AstraZeneca maoy mag-una sa pagmugna og bakuna ug naibanan ang sukaranan sa pasalig ni US President Donald Trump nga may bakuna na batok sa Covid-19 sa di pa ang piniliayng presidensiyal sa Estados Unidos karong Nobyembre 3, gani gipaandam nang mga gobernador sa pagpangandam sa pagsugod sa pagpamakuna karong Nobyembre 1, ang uban nga mga kompaniya nagpabiling masaligon sa ilang kaugalingong clinical trials.
Ang Biontech sa Germany, nga maoy kaabag sa Pfizer, nipahibawo human sa bulilyaso sa AstraZeneca nga mahimong maandam nang bakuna nga ilang gimugna alang sa pagsubli ug pagtugot sa Food and Drug Administration (FDA) sa Estados Unidos sa tungatunga sa sunod buwan sa Oktubre.
- Latest
