Pagpaburot sa mga numero
Atubangan sa awhag nga ilusad sa gobyerno ang dugay nang gisaad nga mass testing sa COVID-19, nga hagbay rang gihimo sa ubang kanasuran ug gitumbok nga usa sa mga hinungdan nganong nakontrolar nilang tinakdanay, nagsige og warawara ang Department of Health (DOH) sa kapasidad sa tanang laboratoryo sa Sugbo ug ubang bahin sa nasud nga nahatagan na og accreditation paghimo og PCR testing.
Gipasigarbo sa DOH nga ang kapasidad sa mga laboratoryo niabot na og 51,302 matag adlaw niadtong Hunyo 19. Gipa-uwahi ang mas gamayng ihap sa aktuwal nga tests.
* * *
Matod sa DOH nalapas na nila ang target nga 50,000 ka inadlaw nga tests sa buwan sa Hunyo. Nipakapin pa og pahinumdom nga mas unang nalabwan ang ilang target nga 30,000 ka inadlaw nga tests sa buwan sa Mayo.
Gipatumoy sa DOH sa ilang pahibawo ang gidaghanon sa aktuwal nga tests nga nahimo sa mga laboratoryo sa matag adlaw. Sa niaging semana, ang kinadaghanan niabot og 19,500 ug ang average nga inadlaw nga tests nikabat lang og 17,500 (nga 37% ug 34% ra sa kapasidad).
* * *
Samang paukyab ang ilang gihimo sa Sugbo. Atol sa pagduaw sa Inter-Agency Task Force (IATF) batok sa COVID-19 sa niaging semana, mapagarbuhong gipahibawo ni Vince Dizon, ang giilang testing czar, nga niabot na og 6,000 ka tests matag adlaw ang kapasidad sa mga laboratoryo sa Sugbo.
Pagdason sa pasalig ni Dizon, nisaad si Cebu City Mayor Edgar Labella nga sa di madugay makahimo nang dakbayan og 1,000 ngadto sa 3,000 ka tests matag adlaw.
* * *
Nangangkon ang DOH 7 nga niabot og 1,553 ka tests ang nahimo sa mga laboratoryo sa Sugbo niadtong Dominggo, Hulyo 5. Sa ato pa, 25% ra ang aktuwal nga tests kon itandi sa kinatibuk-ang kapasidad sa mga laboratoryo sa Vicente Sotto Memorial Medical Center (VSMMC) ug DOH 7 sa Dakbayan sa Sugbo ug ARC Hospitals sa Dakbayan sa Lapulapu.
Nakatag-an ka, wa magtagad ang DOH sa pagpasabot sa mga hinungdan ngano nga wa kapusli ang 75% sa kapasidad sa tulo ka laboratoryo sa Sugbo ug 66% sa kapasidad sa 75 ka laboratoryo sa tibuok nasud.
- Latest
