Nihit ang testing, nidaghang patay
Mas taas gihapon ang positivity rate sa COVID-19 (ihap sa mga nag-positibo kon itandi sa kinatibuk-ang gidaghanon sa swab samples nga gipaubos sa laboratory test) sa Central Visayas kon itandi sa Metro Manila ug ubang bahin sa nasud, segun sa kataposang ihap sa Department of Health (DOH).
Nagtimaan ni nga hangtod karon, human sa pila ka buwan nang pasalig sa Inter-Agency Task Force (IATF) nga palambuon ang mga laboratoryo, wa pa matuman sa gobyerno ang gikinahanglang gidaghanon sa PCR testing sa mga molupyo sa Sugbo, Bohol, Negros Oriental ug Siquijor.
***
Nitaho ang DOH sa Central Visayas nga niabot na og 1,553 ka swab samples ang na-testing niadtong Dominggo, Hulyo 5, mas taas kay sa kapin ra sa 600 ka tests nga ilang nahimo pila ka semana ang nilabay. 279 ka samples gikan sa Sugbo ug Bohol ang nag-positibo, o 18% nga positivity rate.
Mas taas ni kay sa 5% nga positivity rate nga gitakda sa World Health Organization (WHO) nga timaan nga igo na ang gidaghanon sa testing nga gihimo ug nga nakontrolar na ang tinakdanay sa Covid-19.
***
Sama sa naandan, nihit ang detalye sa DOH sa bag-ong mga kaso. Igo lang nihisgot nga ang mayoriya gikan gihapon sa Dakbayan sa Sugbo. Way mga numero pilay napuno sa mga kaso sa mga dakbayan ug kalungsoran sa Sugbo ug Bohol.
Ang local government units (LGUs), nga gipaabot nga motapak sa kuwang, nakapasamot sa kalibog pinaagi sa pagluwat og mga numero nga lahi sa DOH 7.
***
Hangtod niadtong Dominggo sa gabii, managlahi ang mga numero sa DOH 7 ug Cebu City Health Department (CCHD) di lang sa kinatibuk-ang kaso (6,761 sa DOH 7, samtang 6,142 sa CCHD) kon dili hasta sa fatality rate (gidaghanon sa nangamatay kon itandi sa tanang nangasakit): 3.3% sa DOH 7, samtang 3.6% sa CCHD. Pulos mas taas sa nasudnong death rate nga 2.9%.
Gibutyag hinuon sa DOH 7 nga mas taas ang death rate sa Lalawigan sa Sugbo nga niabot og 5.9% (91 ang namatay sa 1,538 nga nataptan sa Covid-19). Hinaut di ni tungod sa pag-promote sa tuob ug pag-outsource sa mga doktor.
- Latest
