Tentasyon sa pagkumpiyansa
Ang pag-insistir sa pipila ka politiko ug negosyante sa pagpamugos sa rapid test kits sa COVID-19 bisan sa pasidaan sa kinadak-ang kahugpongan sa mga espesyalista ug mga doktor nga gawas nga di makatabang makadaot hinuon sa kampanya way kalainan sa binuang nga tinuig nga kampanya batok sa dengue.
Bisan sa pahimatngon sa Department of Health (DOH) nga di epektibo ang fogging ug misting batok sa dengue, kay makalupad palayo nang mga lamok sa di pa mapasiritan, niinsistir ang mga politiko sa pagpangompra og mga kemikal, fogging machines ug mist sprays.
***
Makalibog nganong wa tumana ang tambag sa DOH nga ang pagpanlimpiyo sa palibot, nga makapapas sa tanang posibleng itloganan ug sanayanan sa mga lamok, maoy kinakusgan nga panagang sa katawhan batok sa dengue.
May sukaranan ang mga pasangil nga mas matentalon ang dagkong komisyon kon padayong mangompra sa way kapuslanan nga mga makina ug mga kemikal kay sa pagdasig sa mga molupyo sa pagpanilhig sa ilang mga nataran, paghipos sa mga basura nga kapundohan og tubig ug paghawan sa tanang babag sa pagdagayday sa mga kanal, lim-aw ug mga sapa.
***
Burot nga ginansiya sab ang gidudahan nga giapas sa pipila nga nangugat nga rapid test kits ray bugtong makatabang sa pag-abli sa mga negosyo ug pagpabalik sa mga trabahante. Mahimong nalingla o nakigkonsabo g’yud sa mga ahente nga nikalit lang og panguhong sa mga city hall ug munisipyo.
Bisan wa pay bisan usa ka rapid test kit nga napamatud-an sa Research Institute for Tropical Medicine (RITM) nga epektibo sa pagkaplag sa antibodies batok sa COVID-19, binilyon na ka pesos sa buhis sa katawhan ang giwaldas sa way kapuslanang rapid test kits.
***
May mga politikong nidangop sa fogging ug misting bisan nahibawo nga way kapuslanan batok sa lamok ug makahilo hinuon sa mga molupyo aron lang pagpakita nga duna silay gihimo. Bahala na kon makahatag og sayop nga pasalig sa mga molupyo nga mahimo nang di manlimpiyo sa palibot.
Ang pagpamugos sa rapid test kits di lang makapasimang sa daginutong pundo sa gobyerno gikan sa mas mapuslanong panagang sa COVID-19 kon dili makahatag sab og sayop nga pasalig sa mga molupyo nga mahimong di sila magmatngon.
- Latest
