Dakong kalapasan sa lagda sa DOH

Human nabisto nga may lagda diay ang Department of Health (DOH) nga di mahimong gamiton ang rapid test kits sa mass testing, nahimong kuwestiyonable ang pangangkon sa mga tigpasiugda sa mass testing ginamit ang rapid test kits sa Cebu City, Mandaue City ug Lapulapu City nga nagpaluyo nila ang kadagkoan sa DOH sa Central Visayas.

Kon tinuod nga di lang tigpaluyo kon dili tigpasiugda gyod si DOH-7 Regional Director Jaime Bernadas, mahimo siyang kapasanginlan nga nakalapas sa mga lagda sa ilang ulohang buhatan sa tukmang paggamit sa rapid test kits.

* * *

Gawas nga nagdili sa paggamit sa rapid antibody-based test kits alang sa mass testing, ang DOH Department Circular No. 2020-0160 nga giluwatan niadtong Marso 31, 2020 nitataw sab nga mas tukma silang gamiton alang sa mga pasyente nga may mga timaan sa Covid-19 ug sa mga pasyente nga nakahingpit na sa 14 ka adlaw nga quarantine period.

Sa ilang hingpit nga pagsalikway sa mga lagda sa DOH, maglisod sa pagpagoryo-goryo ang mga politiko ug mga negosyante ug mas maglisod paglusot nga way kalibotan silang Bernadas ug kaubanan sa DOH 7.

* * *

Si Dr. Rowena Burden, usa sa labing unang nisusi sa kamapuslanon sa rapid mass testing, niisa og dugang pagduda:

Napakyas pagmatuod ang mga tigpasiugda nga ang ilang rapid test kits napamatud-ang epektibo sa Research Institute for Tropical Medicine (RITM);

Way klarong lagda pagpili sa mga ipaubos sa rapid tests kay bisan kinsay gikuhaan og blood samples aron makab-ot ang target; ug

Kuwestiyonable ang katakos sa mga laboratoryo pagsusi sa blood samples ginamit ang rapid test kits.

* * *

Ambot nakaamgo na ba sa iyang sayop ug nisugod nag palayo sa kontrobersiya, gisupak ni Bernadas ang binuang nga lagda sa mga tigpasiugda pagpugos sa tanang trabahante sa Sugbo pagpaubos sa rapid mass testing sa di pa makabalik sa trabaho. Nipasabot siya nga di pa mapahamtang ang lagda kay tun-an pa nila unsa kamapuslanon ang mass testing.

Nga makapatumaw sa laing pagduda: Unsa man kamakiangayon ang pagsubli sa DOH sa mass testing nga gawas nga tigpasiugda si Bernadas ang chief pathologist sa DOH 7, Dr. Mary Jane Loreche, mao may tigpamaba ug tigpanalipod sa mass testing?