Mga mensahe sa presidente

Sa nangaging mga pamunoan ang mensahe sa presidente labihan katalagsaon ug busa gihatagan og dako nga importansiya sa katawhan ug sa mga sakop sa media. Ang nangaging mga presidente modiskurso lang atol sa mahinungdanong kalihokan ug mohimo og mensahe sa radyo ug telebisyon alang sa labing mahinungdanon nga mga pahibawo, kasagaran atol sa makalilisang nga katalagman o pagpasabot sa iyang bahin sa dagkong kontrobersiya.

Kasagaran sa ilang mga mensahe sinuwat, sinukod ug mainampingon nga gitumong pagpakalma sa katawhan atubangan sa katalagman, pagduso og mga programa, o pagpanalipod sa ilang buhatan.

***

Giusab ni Presidente Rodrigo Duterte ang naandan. Sa unang mga buwan sa iyang pamunoan, mora lang gihapon siya nga nangampanya. Hapit matag adlaw ang iyang mga pakigpung. May mga adlaw gani nga kaduha o katulo o mas kadaghan pang iyang diskurso.

Kasagaran sa iyang nahaunang mga pakigpung nagbalikbalik sa iyang kinaham nga mga tema: Tapuson niyang problema sa ilegal nga drugas, patyon niya ang mga durugista ug ang human rights advocates nga nibatok sa extrajudicial killings ug apilon og bitay ang tinudlo niyang mga opisyal sa gobyerno nga mangurakot.

***

Bisan unsa lang ang mga okasyon nga gihimoan sa iyang mga pakigpung. Gawas sa pagduaw sa mga kampo sa militar ug kapolisan ug pagtambong sa tigom sa mga negosyante, giduaw niya ang mga haya sa nangamatay nga mga polis ug mga sundawo ug gitunga ang mga kasal ug sumad sa adlawng natawhan sa iyang mga suod.

Kasagaran sa kapin sa takna niyang mga pakigpung way labot sa kalihokan nga iyang gitambongan. Ug bisan unsay okasyon mao ra ang iyang mensahe.

***

Sa pag-lockdown sa Luzon ug sa dakong bahin sa Kabisay-an ug Mindanao tungod sa Covid-19, kanus-a gikinahanglan sa katawhan ang makanunayong pagpasabot, tagsa rang nabatian ang presidente. Kon may mensahe man, sa lawom nang gabii o kadlawon, karong bag-o sa buntag.

Inay mopasabot unsaon pagbadlong ang Covid-19 ug pagtabang ang mga naapiki sa lockdown, gidayeg niyang mga polis ug mga sundawo ug gibalikas ang mga rebeldeng komunista. Sa iyang mensahe gahapon sa buntag, wa magtagad paghatag og kasayuran: Igo na lang gidapit ang katawhan pag-atang sa mas hingpit nga mensahe sa iyang tigpamaba gahapon sa udto.