Bentaha sa mass testing sa COVID

Di angayng matarantar silang Cebu City Mayor Edgar Labella ug kaubanan sa pagsulbong sa mga kaso sa COVID-19 sa Sito Zapatera sa Baryo Luz ug ubang barangay. Angay hinuong mohangop sa kasayuran sa nahimutangan sa mga nangasakit aron makahimo sa mas tukmang sunod nga mga lakang.

Bisan gitumbok nang epicenter sa COVID-19 sa Kabisay-an, di angayng sawayon ang mga opisyal ug molupyo sa Cebu City. Angay hinuong pasidunggan kay ang pagsulbong sa mga kaso di tungod sa kahugawan ni pagpabaya kon dili tungod kay maoy labing unang nag-mass testing gawas sa Metro Manila.

* * *

Ang angayng kuyawan mao ang mga lungsod ug mga dakbayan nga wa pay napahigayon nga mass testing sa COVID-19 hangtod karon. Kay ang nahitabo sa Zapatera nga way tugpahanan, ni pantalan, ni presensiya sa taga China ug ubang kanasuran nga mas unang naigo sa sakit, mahimong, simbako, layo ra to, nahitabo na sab sa ilang kaugalingong nataran.

Inay mopasalig nga mas luwas ang ilang dapit gikan sa katalagman, angayng mangompra sang ubang local government units og test kits aron nga kasugdan ang kaugalingong mass testing sa labing daling panahon.

* * *

Salamat nga gisalikway nilang Mayor Labella ug sa kadagkoan sa Department of Health (DOH) nga undangon nang mass testing sa Sitio Zapatera ug isipon na lang ang tanang 9,000 ka molupyo nga natakdan na sa COVID-19.

Angay hinuon nga pahimuslan ang dakong bentaha sa pagpadayon sa mass testing nga moila sa uban pang mga masakiton aron nga matambalan ug mabuwag ug masubay ang tanang nakaduol sa di makapanakod sa mas daghan.

* * *

Mao ni kapuslanan sa mass testing. Makaangkon ang gobyerno og klarong hulagway kinsay nataptan sa kagaw aron mapatuman ang mas tukmang lockdown sa mga dapit nga labing daghan og kaso inay sa pag-lockdown sa tibuok Luzon ug dakong bahin sa Kabisay-an ug Mindanao, nga morag gilumpong ang mga dapit nga daghang kaso sa mga dapit nga wa pay kagaw.

Kon nagpatuo pang DOH sa tambag sa World Health Organization (WHO) sa mas sayo nga mass testing, mas sayo untang natultolan ang kagaw ug mas sayo untang natambalan ang mga pasyente. Nga di kinahanglan nga malukapa ang nasudnong ekonomiya.