Pagtapok o di pagtapok
Nipasidaan ang Department of Health (DOH) niadtong Pebrero 7 nga di angayng motambong ug magpasiugda og kalihokan nga magtapok ang daghang katawhan aron nga di madugangan ang kahigayonan sa pagkatap sa makamatay nga kagaw gikan sa China.
Apan karong semanaha, nipahibawo silang Health Secretary Francisco Duque III uban nilang Interior Secretary Eduardo Ano ug Tourism Secretary Bernadette Puyat nga mahimo nang ipadayon ang kalihokan nga magtapok ang daghang katawhan. Gidasig gani sila sa pagsuroy sa nagkalainlaing bahin sa nasud.
***
Unsa may mga nahitabo human sa pasidaan sa DOH aron nga makumbinser ang katawhan nga mas luwas na sila gikan sa hulga sa Covid-19?
Nagsubli-subli pagpahibawo ang World Health Organization (WHO) nga angayng mas hugtan ang pagbantay sa Pilipinas ug ubang kanasuran gawas sa China kay posibleng moulbo ang paspas nga tinakdanay sa lokal nga mga molupyo kay nakagawas nang kagaw gikan sa Wuhan ug Hubei; ug
Gikanselar ang kalihokan nga magkinahanglan og dagkong tapok apil nang mga gipasiugdahan sa Department of Education (DepEd) ug Philippine Sports Commission (PSC).
***
Nipasalig si Duque nga luwas na ang mga tapok sa daghang katawhan sa atong nasud kay napahimutang na nila ang tanang panalipod sa katawhan batok sa kagaw. Palihug basaha ang mosunod ug ikaw ang mohukom unsa na ta kaandam:
Nagpabilin ang kakuwang sa mga doktor (usa ra sa matag 33,000 ka pasyente) ug ang kakuwang sa mga tambalanan (usa ra ka hospital bed sa matag 1,121 ka pasyente; ug
Inay dugangan, gilaslasan og P10 bilyones ang budget sa DOH karong tuiga.
***
May sukaranan ang mga kabalaka nga nikalit pagbalitok ang baruganan sa DOH tungod sa ilusad nga nasudnong kampanya sunod buwan pagdasig sa katawhan sa paggasto aron pagpabaskog sa industriya sa turismo--laslasan ang presyo sa mga baligya sa shopping malls, paubsan ang bayranan sa hotels ug resorts ug i-baratilyo ang mga lingkoranan sa mga ayroplano. Tan-awon nato unsay tuohan sa katawhan:
Ang bag-ong pagdasig sa pagtabang sa pagpalambo sa ekonomikanhong kalihokan; o
Ang nahaunang mga tambag sa paglikay sa wa kinahanglana nga kalihokan aron nga kalikayan ang kahigayonan sa paspas nga pagkatap sa kagaw nga gidudahang makatakod bisan wa pay timaan sa sakit.
- Latest
