Init ang kinakusgan nga panagang?
May eksperto nang nidason sa mga pangagpas, nga gihulagway nga way sukaranan sa siyensiya, nga tulo ray natino nga kaso sa Corona Virus 2019 (COVID-19) sa Pilipinas, way bisan usa sa Indonesia ug pipila ra sa Australia ug Africa kay di sama kabugnaw ang ilang temperatura sa China, Japan ug ubang kanasuran nga mas daghan og kaso.
Si John Nicholls, pathology professor sa University of Hong Kong, gihulagway nga eksperto sa Severe Acute Respiratory Syndrome (SARS) niadtong 2002 ug 2003, niingon nga mapapas ra ang COVID-19 kon magsugod na og saka ang temperatura karong Mayo.
***
Gipasabot ni Nicholls ang tulo ka kinakusgan nga panagang sa bag-ong kagaw:
Init sa adlaw nga molaslas sa lahutay sa kagaw ngadto na lang sa duha ug tunga ka gutlo gikan sa 13 ngadto sa 20 ka gutlo sa ngiob nga palibot;
Ang temperatura nga 30 degrees celsius makapaluya kon di man makapa-inutil sa kagaw nga labihan kahimsog kon mahimutang sa temperatura nga 4 degrees ngadto sa 10 degrees; ug
Ang taas nga humidity makapaluya kon di man makapatay sa kagaw.
***
Ubang mga eksperto nagdumili hinuon pagdason sa kamasaligon ni Nicholls nga mawa ra og iya ang COVID-19 ug, sama sa SARS ug Middle East Respiratory Syndrome (MERS), di na mobalik.
Samtang niangkon nga makapahinay sa pagkatap sa kagaw ang mas taas nga temperatura, si Dr. Andrew Pekosz sa W. Harry Feinstone Department of Molecular Microbiology & Immunology sa Johns Hopkins University niingon nga sama ba sang epekto sa umaabot nga ting-init sa kagaw nga nakapatay na og kapin sa libo ug nakatakod na og kapin sa 45 mil.
***
Si Nicholls, nga nagtuon sa corona virus sa niaging 25 ka tuig, nabalaka hinuon sa pipila ka kaso sa pagpanakod sa COVID-19 bisan kon ang pasyente wa pa mopakita og mga timaan sa sakit. Gitataw hinuon sa World Health Organization (WHO) nga, sama sa mga kabalaka nga ang bag-ong kagaw molutaw sa hangin, wa pay klarong mga ebidensiya ini.
Ang pangangkon sa China sa padayong pagtidlom sa bag-ong mga kaso natabonan hinuon nga padayon nga pagsulbong sa gidaghanon sa mga nangamatay: 97 niadtong Domingo, 108 niadtong Lunes ug 97 niadtong Martes.
- Latest
