Paukyab ra diay ang tanan
Usa sa mga pasangil batok sa pamunoan ni Presidente Rodrigo Duterte nga nagkabantang nga abunda ang sukaranan human sa kapin sa tulo ka tuig niyang paglingkod sa Malakanyang mao ni: Nagpatuyang siya og pasalig sa higanteng mga programa sa katawhan nga wa diay ideya unsaon pagpatuman.
Di na lang nato hisgutan ang saad pagsulbad sa ilegal nga drugas sud sa unom ka buwan. Kay hangtod karon naglibog pa unsaon paglusot: Human niangkon nga napakyas, gitudlo si Bise Presidente Leni Robredo; apan human sa kapin duha ka semana, siya na say nibalik sa pagduma.
* * *
Dapiton nakong imong pagtagad sa laing upat ka programa nga gisige og saad sa nangaging mga pamunoan apan si Presidente Duterte ray nakapatuman:
•Paghatag og P2,000 nga usbaw sa pension sa Social Security System (SSS);
•Paglibre sa matrikula sa tanang kolehiyo ug unibersidad sa lokal ug nasudnong kagamhanan;
•Paglibre sa tambal, ospital, ug batakang pangalagad medikal sa tanang Pilipinhon; ug
•Paghaw-as sa katawhan gikan sa kakabos ug hingpit nga pagpalambo sa nasudnong ekonomiya pinaagi sa higanteng mga proyekto sa “Build, build, build” (BBB) program.
* * *
Labing uwahi nga kasayuran sa pagpatuman sa mga programa:
•P1,000 ray usbaw sa pension sa SSS niadtong 2017 ug bisan nisakang bayranan sa SSS wa pay klaro kanus-a madawat ang nahibiling P1,000;
•Kuwang ang kuwarta alang sa P100 bilyones matag tuig paglibre sa matrikula sa state universities ug colleges;
•Kuwang ang kuwarta alang sa P257 bilyones sa unang tuig sa pagpatuman sa Universal Health Care Act (UHCA); ug
•Samtang nagsobra ang kuwarta sa BBB, luya ang pagpatuman sa mga proyekto.
* * *
Mga timaan nga sama sa drugas mapakyas sab ang pamunoang Duterte:
•Kon apurahon ang dugang P1,000 nga usbaw sa pension, mabangkarota ang SSS ug mapilde ang mga benepisyo hasta sa umaabot nga pensioners;
•Inay dugangan, gilaslasan ang budget sa Commission on Higher Education alang sa libreng matrikula;
•Inay dugangan, gilaslasan ang budget sa Department of Health nga maoy mopatuman sa UHCA; ug
•25% ngadto sa 30% ray napamatuman sa mga proyekto sa Department of Public Works and Highways ug Department of Transportation nga maoy gitahasan sa kinabag-an sa mga proyekto sa BBB.
- Latest
