Paglubag sa kasaysayan
Ambot nahingpit na ba ang pagsubli sa bag-ong pelikula mahitungod sa pagdunggo ni Ferdinand Magellan sa Sugbo 498 ka tuig ang nilabay. Nga gisaad sa Crystal Sky Multimedia, tig-apud-apod sa Pilipinas sa “Elcano & Magellan,” tungod sa mga pagsaway nga gihimo nilang kontrabida si Lapulapu.
Ambot natapok na bang mga eksperto sa kasaysayan, mga makinaadmanon ug mga suhito sa pelikula aron tan-awon ang tibuok pasundayag atubangan sa mga kabalaka nga mahimong gilubag nila ang mga panghitabo sa 1521. Nipasalig nga mahimong usbon o putlan ang pelikula pinasikad sa mga sugyot.
***
Nangangkon nga mga eksperto sa kasaysayan, nga utro sang wa pa kakita sa pelikula, nitambag nang daan nga angay natong tahuron ang mga naghimo sa animated nga pelikula, nga pulos taga Espanya, sa ilang hubad sa gubat nilang Magellan ug Lapulapu sa kabaybayonan sa Mactan.
Nitabang na sila og hanig daan nga di makuwestiyon ang mga Katsila nga moisip nga bayani ni Magellan. Kay gawas nga maoy labing unang nakalibot sa kalibotan, gihulagway pa g’yud nila nga usa lang ka maglalawig ug way tinguha sa pag-ulipon sa mga Sugbuanon.
***
Sa di pa paundayonan sa nangangkon nga mga eksperto ang ilang paghimong lunsay sa tuyo ni Magellan sa Sugbo, angay silang pabasahon sa kontrata nilang Magellan ug Hari Carlos sa Espanya nga pinetsahan og Marso 22, 1518:
Gihatagan si Magellan og lima ka barko, mga tripulante, armas ug pagkaon. Gisaaran sab siya og monopoliya sa makaplagan nga ruta sud sa 10 ka tuig ug ikalimang bahin sa tanang katigayonan nga maani sa panaw.
***
Gibasol sa nangangkon nga mga eksperto si Rajah Humabon nga maoy tinuod nga kontrabida. Kay mao kunoy nangintriga aron maduhig si Magellan sa away nilang Lapulapu. Angay silang pahinumdoman nga wa magkuwang pagpahinumdom ni Magellan silang Juan Sebastian Elcano ug kaubanan nga ang ilang tuyo mao ang isla sa lamas di ang pakigubat sa mga lumad.
Apan napanid-an sa iyang mga sakop si Magellan nga nagbuutbuot pagpalapad sa iyang tahas. Nga gibalibaran gani niyang tanyag nga tabang nga mga sakop ug mga armas ni Humabon. Kinsa iyang gidapit sa pagtan-aw lang unsaon paglupig sa mas takos nga mga manggugubat sa Espanya si Lapulapu.
- Latest
