Pagtibugsok sa presyo sa baboy

Samtang nag-aginod ang trapiko sa nasudnong highway sa Mandaue niadtong Martes (naabtan mi og kapin sa oras sa paglatas sa kapin ra sa duha ka kilometro nga gintang gikan sa Jagobiao paingon sa taytayan sa Butuanon), nakahigayon ko pagsuhid sa mga tindahan nga among nalabyan.

Usa sa nakadapit sa akong pagtagad mao ang akong kinaham nga tindahan og inasal nga manok nga nibutang og pahibawo sa mas taas nilang presyo: P203 na ang buok. P18 ni nga uminto sa ilang presyo sa kataposan nakong palit pila ka buwan ang nilabay.

* * *

Nireklamo sa mga tigpaminaw sa Arangkada sa DYAB Abante Pa, Bisaya! nga mas mahal ang karneng manok sa kamerkadohan. Giingnan sila sa mga mamaligyaay nga gipasakaan ang presyo sa ilang supplier tungod sa pagdaghan sa mga namalit og manok human nisulbong ang kahadlok sa African Swine Fever (ASF).

Niangkon ang akong mga kaila nga bisan sa pasalig nga di makatakod sa tawo ang ASF nilikay sila sa mas barato untang karneng baboy. Gitumbok nilang mga sakit sa hayop ra unta sa una apan nitakboy na sa mga tawo karon.

* * *

Di na matawag nga huhungihong ang kasayuran sa ibabaw kay  gidasonan sa Philippine Statistics Authority (PSA) nga nisulbong ang presyo sa manok, baka, isda, itlog ug ubang alternatibo sa karneng baboy.

Nahitabo ni di lang sa Sugbo kon dili labi na sa Metro Manila kay nasudlan na sa ASF ang pipila ka barangay sa Quezon City. Labing dakong pagtidlom sa konsumo sa karneng baboy namatikdan sa Central Luzon nga maoy unang natakdan sa kagaw.

* * *

Unang nakabatyag sa suliran ang atong silingang nasud sa South Korea. Giisip sa ilang mga mag-uuma nga mas dakong problema kay sa hulga sa ASF ang pagtibugsok sa presyo sa karneng baboy. Nga maoy labing nakapa-alkanse nila bisan wa matakdi sa ASF ang ilang mga binuhi.

Maong niawhag sila nga mas maayong itingob sa gobyerno sa South Korea ang tanan nilang paningkamot sa pagpugong sa pagkatap sa ASF ug di na hilabtan ang mga karneng baboy. Kay makahatag lang og sayop nga ideya sa mga konsumidor sa pag-boykot sa mga produkto sa naapiki nang daan nilang industriya sa baboy.