Krisis sa trapiko
Kon motubag sa hagit ang lokal nga mga opisyal sa Sugbo sa pagsuway sa mga sakyanang pamasahero sa ilang pag-adto sa ilang mga buhatan ug pagpauli sa ilang mga pinuy-anan, manghinaot ko nga ilang masinati ang mosunod:
• Maabtan og tunga ngadto sa usa ka oras pag-atang sa dan una makatsamba og bakanteng sakyanan ug kinahanglan pang makiglumba sa ubang pasahero pagkuha sa kataposang lingkoranan;
* * *
• Mabuwad sa adlaw o manghilam-os sa uwan samtang nagkamang ang ilang PUJ nga mo-irog og usa ka dangaw matag lima ka gutlo sa nabara nga trapiko;
• Mapakong ang ilang ulo sa mubo nga atop ug magyaka sa kaubos sa lingkoranan nga mag-abot ang ilang suwang ug tuhod aron kahatagan og luna ang mga pasaherong palingkuron sa mga bangkito;
• Mangugat sa tibuok biyahe kay katunga ra sa ilang sampot ang makalingkod, ang lingkoranan nga para sa walo pahimutangan gyod og siyam;
* * *
• Magpugong og ginhawa aron di masuyop ang aso sa mga sigarilyo sa drayber ug ubang pasahero ug magsige og hikap sa pitaka kay tingali og nataparan sa bagis nga mga sakop sa budol-budol gang; ug
• Mapugos og hinumdom sa tanang pangaliya nga makaabot sa suga sa di pa mopuwa ug di lang unta mabara sa sunod nga eskina ug wa lang unta mag-eksperimento ang traffic enforcers aron nga di kaayo mauwahi sa klase o sa trabaho ug wa lang unta sapota ang drayber sa kamahal sa lana ug mga palaliton sa iyang asawa ug matrikula sa iyang mga bata ug sa kadagko na sa pangayo sa mga dispatser ug kakonsabong mga polis.
* * *
Gamay ra hinuong kahigayonan nga sagubangon nila ang inadlaw nga kalbaryo sa mga pasahero. Kon may mangahas man, segurong magbitbit og daghang guwardiya nga mohimong mas gaan ug mga sakop sa media nga mosangyaw sa dako nilang sakripisyo.
Mas dako ang kahigayonan nga padayon silang magpakabuta-bungol sa krisis sa trapiko sakay sa bugnaw ug hunulhunol nga mga sakyanan nga pinalit sa atong buhis, nga gimaneho a mga drayber nga gisuholan sa atong buhis, ug ang mga mas pating mag-wangwang ug magpahawan sa ilang agianan sa speed cops kansang mga motorsiklo, armas ug suholan gikuha gikan sa atong buhis.
- Latest
