Pagtidlom sa konsumo sa lana
Makaginhawa og luag ang mga motorista karong adlawa tungod sa laslas sa presyo sa mga produkto sa lana human sa kinatas-ang layat sa mga presyo karong tuiga nga gipatuman sa niaging semana. Maayo na lang nga wa masumpayi ang drone attacks sa duha ka kinadak-ang oil fields sa Saudi Arabia.
Tulo ang hinungdan sa pagtibugsok sa presyo: Una, pagkalma sa tensiyon sa Middle East; ikaduha, paspas nga paghibalik sa produksiyon sa lana sa Saudi; ug ikatulo, pagtidlom sa demanda sa lana tungod sa kaluya sa kalibotanong ekonomiya.
* * *
Gamay ra hinuon ang laslas kon itandi sa uminto sa niaging Martes. Sa unang siyam ka buwan karong tuiga, mas daghan ug mas dagko ang uminto kay sa us-os:
• Nimahal ang gasolina og ka-25 ka higayon ug nibarato og ka-14 ka higayon nga nisangpot sa net increase nga P10.04 matag litro;
• Nimahal ang krudo og ka-22 ka higayon ug nibarato og ka-14 ka higayon nga nisangpot sa net increase nga P8.04 matag litro; ug
• Nimahal ang kerosene og ka-23 ka higayon ug nibarato og ka-14 ka higayon nga nisangpot sa net increase nga P4.87 matag litro.
* * *
Dungan sa paghibalik sa naandang kapasikad sa Saudi sa inadlaw’ng produksiyon sa 11.3 milyones ka baril sa lana pila lang ka adlaw human sa pangatake napuypoy sab ang kahadlok sa nag-ung-ong nga gubat sa Middle East:
• Gibutyag sa Iran nga nitanyag si US President Donald Trump sa pagbakwi sa tanang ekonomikanhon nga mga silot human sa pagbasura sa nuclear deal ni kanhi Presidente Barack Obama kon mapahigayon ang sabutsabot; ug
• Nideklarar ang Saudi og parsiyal nga ceasefire uban sa Yemen kansang mga rebelde niangkon og responsibilidad sa drone attacks.
* * *
Nadugangan sab ang mga timaan sa padayon nga pagluya sa kalibotanong ekonomiya tungod sa nagkagrabe nga gubat sa patigayon tali sa China ug Estados Unidos:
• Nitibugsok ang konsumo sa lana sa China, ang ikaduhang labing dako nga ekonomiya ug kinadak-an nga konsumidor sa lana sa tibuok kalibotan, tungod sa paghiyos sa kita sa iyang mga industriya; ug
• Ang nag-ung-ong nga impeachment ni Trump sa US House of Representatives nga gidominahan sa Democrats makadugang sa mga palas-unon sa Amerikanhong kompaniya.
- Latest
