Kapating sa NFA
Kon pagahiay lang og ulo ang hisgutan lisod malabwan ang kadagkoan sa National Food Authority (NFA). Bisan kapila na gibadlong ug nabulilyaso ni-insistir lang gihapon sa pagsupak sa ilang kaugalingon nga mga lagda. Klaro nga wa pa g’yud motagam bisan sila ang gitulisok sa mosunod nga mga krisis:
• Pagkabasiyo sa tanang bodega sa NFA sa tibuok nasud nga gikabay-an sa mga negosyante pinaagi sa pagpaburot sa presyo sa commercial rice sa kamerkadohan; ug
• Padayon nga paggamit sa pundo nga gigahin aron unta pagtabang sa mga mag-uuma alang sa laing katuyoan.
* * *
Labing bag-o nilang pakauwaw mao ang pagdumili sa pagpalit sa mga tipasi sa mga mag-uuma. Nga naigo nang daan sa pagpatuman sa rice tariffication law sayo karong tuiga gisamotan pa g’yud sa kapakyas sa gobyerno pagtuman sa saad nga hinabang nga P10 bilyones, nga gitawag og Rice Competitiveness Enhancement Fund (RCEF).
Ang pagsalikway sa NFA sa ilang tahas sa pagpamalit sa mga tipasi mao ang nakatiwas sa katalagman sa 2.3 milyones ka mag-uuma. Napugos na pagpangutang og ikapakaon sa ilang pamilya. Ang uban nibiya sa umahan ug nangita og laing kahinguhaan.
* * *
Nakadawat ang NFA og P7 bilyones nga subsidy gikan sa nasudnong gobyerno matag tuig aron ipamalit sa mga tipasi sa labing menos tag P20 matag kilo aron nga di kapahimuslan sa mga komprador nga nag-piyesta sa mas barato nga imported nga commercial rice.
Bisan kapila na badlonga sa Commission on Audit ang NFA nipadayon sa binuang nga katunga ray gipamalit og tipasi kay ang laing katunga gibayad sa ilang utang sa Land Bank of the Philippines.
* * *
Karong gisugo na sab sila ni Presidente Rodrigo Duterte sa pagpamalit sa mga tipasi sa mga mag-uuma nagpa-goryo-goryo dayon ang NFA nga nagkinahanglan sila og dugang kuwarta ug dugang bodega.
Klarong nagpaugat sa tambag sa mga senador ug sa Department of Agriculture pagbaligya sa 4.5 milyones ka sakong imported rice nga natanggong sa ilang mga bodega. Nga mohalin og P6.5 bilyones kon ibaligya og tag-P27 ang kilo. Busa gawas nga makapalit og mas daghang tipasi mabakante pa g’yung ilang mga bodega alang sa makompra nga lokal nga ani sa mga mag-uuma.
- Latest
