Hustisya ni Noy Minggoy
Way kisaw sa Sugbo niadtong Lunes, Agosto 12, sa ika-107 nga sumad sa adlaw’ng natawhan ni Domingo “Minggoy” Abagon Lopez. Ambot pila ra’y nahinumdom sa atong katiguwangan, bisan giawit pa sa mga haranista ug gipatokar pa sa mga sibyaanan sa radyo, ang labing inila sa kapin sa 200 niya ka komposisyon.
Bisan ang usa sa iyang kabilin nga “Rosas Pandan” mao na karo’y giila nga labing kinaham nga Pilipinhong awit sa tibuok kalibotan, wa siyang kadawat og samang paghigugma sa iyang yutang natawhan.
* * *
Bisan sa buhi pa (namatay si Noy Minggoy niadtong Enero 20, 1981 sa pangedarong 69) gikawatan nang daan og kredito sa “Rosas Pandan”:
• May nangangkon nga ang naghimo sa awit mao ang laing bantogang Sugbuanon nga si Piux Kabajar (siya’y nagsuwat sa zarzuela sa dekada 50 nga gipaha-oman ni Noy Minggoy sa awit); samtang
• May niingon nga ang kompositor mao si Levi Celerio (ang national artist nga igo lang sab nga ni-Tinagalog sa “Kasadya Ning Taknaa” ni Vicente Rubi ug Manuel Velez).
* * *
Maayo na lang nga natipigan sa anak ni Noy Minggoy, si Rebecca Lopez Montaño, ang patent sa “Rosas Pandan” nga nihingan sa iyang amahan nga mao’y nagtagik sa huni ug lyrics.
Napakita sab ni Rebecca ang kontrata sa iyang amahan uban sa Mareco, tagduma sa Mabuhay ug Villar Records, nga gipanag-iya ni Manuel Villar, ang amahan sa recording industry sa nasud.
* * *
Ang labing tam-is nga hustisya alang ni Noy Minggoy napahamtang niadtong 1995 sa gamay’ng lungsod sa Puig-reig sa rehiyon sa Bergueda, sa Catalonia sa Espanya, atol sa El Festival Internacional de Cant Coral Catalunya Centre, kalibotanong bangga sa choirs sa kanasuran.
Gipangayoan sa mga tigpasiugda si musical director George Gemora Hernandez og komposisyon nga awiton sa kapin sa libo ka sakop sa choral groups pagtak-op sa kalihokan. Si Hernandez, nga gradwado sa University of the Philippines College of Music, Tagalog nga dako, nisugyot sa orihinal nga bersiyon sa “Rosas Pandan” ni Noy Minggoy, di sa kinopya nga bersiyon ni Celerio. Gawas nga gihangop sa choral groups giawit pa g’yud pagbalik nila sa China, Estados Unidos, Canada, Britanya, Russia, ug ubang kanasuran ug gitudlo sa sunod nga mga henerasyon sa mga mag-aawit.
- Latest
