Nisulbong, wa motidlom
Kon may uwaw ang lokal nga mga opisyal sa Department of Health (DOH) sa Sugbo ug Central Visayas, angay silang moadto sa labing duol nga baybayon (nipasalig bitaw ang PAGASA nga di na sama kakusog ang habagat ug kadagko ang bawod karong adlawa) ug ilubong sa bas ang ilang mga dagway.
Kay pila ka adlaw human sila nipasigarbo nga nagsige na og tidlom sa nangaging mga buwan ang mga kaso sa dengue sa Sugbo, Bohol, Negros Oriental, ug Siquijor, gideklarar sa ulohang buhatan sa DOH ang epidemiya sa dengue sa rehiyon.
* * *
Gitumbok sa DOH ang Sugbo ug Central Visayas nga nakatampo sa kapin sa 21,000 ka bag-ong kaso sa kataposang semana sa niaging buwan sa Hulyo. Kanus-a niabot og 167,606 ang naigo sa dengue sa tibuok nasud kon itandi sa 146,062 dihang gideklarar ang nasudnong epidemiya sa dengue niadtong Hulyo 20.
Sa ato pa, dihang nanghambog ang lokal nga mga opisyal sa DOH sa niaging semana sa pagtidlom sa mga kaso sa dengue sa rehiyon, nahibawo na sila sa padayong pagsulbong sa mga kaso dinhi apan namasin lang nga malipat ang publiko sa pagmaniobra sa mga numero.
* * *
Di pa g’yud na mao. Samtang nangangkon sila nga nitidlom nang mga kaso sa Central Visayas kon itandi sa pagsulbong sa ubang rehiyon labi na sa Western Visayas ug Eastern Visayas, dako sab og tampo ang atong rehiyon sa dugang 39 nga nangamatay sa dengue.
Nia pa: Apil sa nailad sa sayop nga pangangkon sa rehiyonal nga buhatan sa DOH ang lokal nga mga opisyal sa Sugbo ug Central Visayas nga nagdumili pagdeklarar og state of emergency sa dengue aron unta nga mas matutokan ang katalagman.
* * *
Hinaot nga mohunong na pagmasahe sa mga numero ang lokal nga mga opisyal sa DOH ug modason na pag-angkon og responsibilidad sa kapakyas pagbadlong sa paglayat sa dengue sa kinatas-an nga ang-ang sa lima ka tuig.
Gawas sa Central Visayas, duha pa ka rehiyon ang nahiagom og epidemiya, ang Soccsksargen ug Bangsamoro Autonomous Region in Muslim Mindanao. Napuno sa unang pito ka rehiyon nga may epidemiya sa dengue, ang Calabarzon, Mimaropa, Bicol, Western Visayas, Eastern Visayas, Zamboanga Peninsula, ug Northern Mindanao.
- Latest
