Katihik ug katalawan
Tanang timaan nagpakita nga masulbad na ang kakuwang og kuwarta sa pagpatuman sa higanteng mga proyekto sa pagsulbad sa baha sa mga dakbayan ug kalungsoran sa Metro Cebu. Gawas sa binilyon ka pesos nga gigahin sa Department of Public Works and Highways (DPWH), gipaabot nga makatabang sab ang kasuod sa Malakanyang sa lokal nga mga opisyal nga nakadaog sa piniliay niadtong Mayo 13.
Wa na gyod tingali rason nga malaktawan ang mga Sugbuanon sa “Build, Build, Build” ni Presidente Rodrigo Duterte. Kay wa ra ba gyod maapil ang Sugbo sa kinadak-an nga mga proyekto nga ipatuman. Ang pipila ka dagkong proyekto gisigehan lang og saad nga masugdan apan wa pay bisan usa nga nakabuylo.
* * *
Gipasalig sa DPWH nga P23.5 bilyones ang gahin sa Metro Cebu Integrated Flood and Drainage System Master Plan nga humanon sa di pa mapupos ang termino sa presidente:
Sunod tuig, 2020, ipatuman ang mga proyekto nga mobalor og P4.6 bilyones;
Sa 2021, isunod pagpatuman ang mas daghang proyekto nga balor og P11.9 bilyones; ug
Sa 2022, tiwason pagtukod ang dugang mga proyekto nga balor og P7 bilyones.
* * *
Apan di lang ang kakuwang sa kuwarta ang nakababag ug nakapalangay sa mga paningkamot batok sa baha: Ang kakuwang sa kaisog ug determinasyon sa pagpatuman sa balaod, nga nitakboy ug nakapa-inutil sa nangagi nga mga pamunoan, gikabalak-an nga manakod sab sa mga nagtungkawo karon sa gahom.
Gipahibawo sa DPWH nga unahon nila ang pagpalapad ug pagpalawom sa 34 ka suba sa Metro Cebu. Sayon ning istoryahon apan labihang lisora nga buhaton.
* * *
Kay kinahanglan nga ilang papahawaon ug pangitaan og tukma nga relocation sites ang kaliboan ka pamilya kansang mga panimay naa sa mga tampi sa mga suba. Mas lisod ang pagbungkag sa nagtungtong sa mga suba nga sementadong buildings nga gipanag-iya sa mga negosyante nga dako og amot sa kampanya sa lokal ug nasudnong mga politiko.
Maong pasayloa ang mga kabalaka nga ang binilyon ka pesos nga gipasalig nga makasulbad sa baha mahurot sa taphaw nga mga proyekto, sama sa paglusad og mga kampanya paghipos sa mga basura, pagdili sa mga plastik ug pagbutang og mabulukong mga dayan-dayan sa mga suba.
- Latest
